Spánn borgaði 5,074% fyrir 12 mánaða bréf í morgun

Spánverjar buðu í morgun út 12-18 mánaða skuldabréf og reyndist það útboð þeim dýrt. Krafan á 12 mánaða bréf var 5.074% en til samanburðar var hún 2,985% á sambærileg bréf í maí. Þeir fara aftur á markað á fimmtudag með 3ja til 5 ára bréf.

Bank of America heldur því fram, að Spánn þurfi að leita eftir öðru neyðarláni innan skamms til viðbótar þeim 100 milljörðum evra, sem þeim var lofað fyrir rúmri viku. Bankinn telur að Spánn þurfi 350 milljarða evra til viðbótar þannig að heildarupphæðin verði um 450 milljarðar evra en það er upphæð, sem mun reyna á greiðslugetu evruríkjanna að sögn Daily Telegraph í morgun.

Bill Gross, aðalforstjóri Pimco, sem er stærsti skuldabréfasjóður í heimi segir við Bloomberg að spænsk skuldabréf séu ekki lengur öruggur fjárfestingakostur og bætir því við að Þýzkaland fari að verða áhættusamt eftir því sem kreppan breiðist út.

Spænskt fjármáladagblað, Cinco Dias, líkir stöðunni á skuldabréfamörkuðum fyrir Spán við „slátrun“. eða „fjöldamorð“. Spænskir bankar þurfa að endurfjármagna 540 milljarða evra á mörkuðum á næstu þremur árum.