ESB-einkaleyfi: 40 ára deilu lýkur - Danir deila um nauðsyn þjóðar­atkvæða­greiðslu

Nýlega voru reglur um einkaleyfisdómstól ESB samþykktar á ESB-þinginu og lítur danska ríkisstjórnin á það sem mikilvægan árangur af formennsku sinni í ráðherraráði ESB að ljúka afgreiðslu tillagna um ESB-einkaleyfi sem hafa verið 40 ár til umræðu innan ESB. Stjórnin hefur hins vegar enga tryggingu fyrir að geta lokið málinu á danska þinginu. Það gerir hún ekki nema Danski þjóðarflokkurinn samþykki. Í aðild að dómstólnum fellst fullveldisframsal og þarf 5/6 hluti danskra þingmanna að samþykkja aðildarlögin svo að skilyrðum dönsku stjórnarskrárinnar sé fullnægt. Andstæðingar ESB á danska þinginu eru Danski þjóðarflokkurinn og Enhedslisten (Einingarlistinn lengst til vinstri).

Forystumaður jafnaðarmanna í ESB-málum, Jens Joel, vonar að sér takist að fá þingmenn Danska þjóðarflokksins til að samþykkja lögin um einkaleyfisdómstól ESB.

„Það yrði mjög erfitt að efna til þjóðaratkvæðagreiðslu um þetta mál, fyrir utan að vera mjög tæknilegt, hefur það ekki mikið gildi fyrir venjulegan Dana, það skiptir hins vegar miklu fyrir fyrirtæki sem selja framleiðslu sína. Einmitt þess vegna er óskiljanlegt að Danski þjóðarflokkurinn vilji bregða fæti fyrir málið, það skaðar aðeins danskt atvinnulíf,“ segir Jens Joel þingmaður jafnaðarmanna sem vonar að sér takist að snúa þingmönnum Danska þjóðarflokksins til fylgis við frumvarpið.

Morten Messerschmidt, ESB-þingmaður Danska þjóðarflokksins, er hins vegar óbifanlegur og telur að um fullveldisframsal sé að ræða gerist Danmörk aðili að einkaleyfis-dómstólnum og það krefjist þjóðaratkvæðagreiðslu.

Fulltrúar atvinnurekenda hvetja danska þingmenn til að afgreiða málið eins fljótt og kostur er. Verði það ekki gert lendi dráttur á afgreiðslu málsins þyngst á litlum og meðalstórum fyrirtækjum sem verði undir í samkeppni á innri markaðnum.

ESB-einkaleyfissamningur var afgreiddur á leiðtogafundi ESB-ríkjanna 29. júní 2012. Hann hefur vakið deilur innan ESB þar sem gert er ráð fyrir að þrjú tungumál verði notuð til lýsinga á einkaleyfum: enska, þýska og franska. Af þessum sökum halda Ítalir og Spánverjar sér utan við samninginn. ESB-einkaleyfið er náskylt evrópska einkaleyfinu, European Patent, sem er veitt samkvæmt European Patent Convention en 38 ríki eiga aðild að henni. Evrópsk einkaleyfi verða, eftir að þau eru veitt, kippa af einkaleyfum sem má fá samþykkt í þeim ríkjum sem umsækjandi nefnir. ESB-einkaleyfi fær gildi í öllum 25 ESB-ríkjum sem hafa staðfest ESB-einkaleyfissamninginn eftir að hafa fengið viðurkenningu sem evrópskt einkaleyfi. Hið samræmda kerfi dregur úr þýðingarkostnaði (með því að snúa að þremur tungumálum), minnkar skráningarkostnað (eitt gjald fyrir allt svæðið) og einfaldar réttargæslu með einum dómstóli fyrir allt svæðið.

Fyrir utan ágreining um tungumál á einkaleyfum hefur einnig verið deilt harkalega um aðsetur hins nýja dómstóls. Það verður í París. Í London verður fjallað um hluta einkaleyfa og annan hluta í München auk þess sem þjónustuskrifstofa vegna ESB-einkaleyfa verður þar.

Við núverandi aðstæður er verða fyrirtæki eða einstaklingar innan ESB að sækja um skráningu einkaleyfis í hverju einstöku ESB-ríki og er talið að það kosti allt að 20.000 (25.200 dollara) evrum fyrir hvert einkaleyfi, þar af 14.000 evrur vegna þýðinga. Í Bandaríkjunum kostar um 1.850 dollara að fá einkaleyfi skráð.