Nouriel Roubini: Finnar kunna að verða fyrstir til að segja skilið við evruna

Finnar kunna að segja skilið við evruna á undan Grikkjum að mati Nouriels Roubinis, heimsþekkts hagfræðings. Kemur þessi skoðun heim og saman við vangaveltur margra annarra um upplausn evru-samstarfsins, flestir hafa þó verið þeirrar skoðunar að Grikkir yrðu fyrstir til að velja aðra mynt en evru.

Nouriel Roubini

Nouriel Roubini hefur samið ritgerð undir fyrirsögninni: „Fix it or fixit“. Í þessu felst orðaleikur „fix it“ þýðir „kippið í lag“ en „fixit“ er sett saman úr orðunum Finnland og exit (útgangur). Fyrirsögnin gefur til kynna að Finnar slíti evru-samstarfinu verði því ekki breytt til betri vegar.

Roubini færir nokkur rök fyrir skoðun sinni, meðal annars þau að margir nágrannar Finna noti ekki evru. „Úr því að engin norræn þjóð notar evru hvaða ávinning hafa Finnar þá af henni?“ spyr Roubini.

Önnur rök eru þau að Finnar geti tekið upp sömu aðferð og Danir og fest gjaldmiðil sinn við evruna. Þá minnki útgjöld finnska ríkisins með því að velja „fixit“. Utan evru-samstarfsins þurfi Finnar ekki að greiða til ESM, hins varanlega björgunarsjóðs evrunnar.

„Þótt þeir sem formlega styðja “fixit„ séu nú í minnihluta eykst umræða heima fyrir um kosti og galla aðildar. Nálgist Grikkir fallið fram af brúninni og þarfnist Ítalir og Spánverjar meiri stuðning evru-ríkja munu Finnar leggja mat á hvort meiri áhætta felist í evru-aðild en kostir,“ segir Roubini.

Nouriel Roubini er hagfræðiprófessor við New York Univeristy. Hann sagði fyrir um fjármálakreppuna 2008. Kölluðu fjölmiðlar hann þá dr. Doom, dómsdagspámann, vegna svartsýni og „hrakspáa“. Hann neitar að að láta stjórnast af svartsýni og hefur lagt til að sér sé frekar gefið viðurnefnið dr. Realist, raunsæismaðurinn.

Heimild:epn.dk