Írar: Makríllinn er að hverfa af Íslandsmiðum - draga á 7,5% tilboð tafarlaust til baka

Írar leggja til við sjávarútvegsráðherra ESB-ríkjanna sem koma saman til fundar í Brussel mánudaginn 16. júlí að tilboð til Íslendinga um 7,5% hlutdeild í veiðikvóta á makríl verði dregið til baka enda sé makríll að hverfa úr íslenskri lögsögu. Þetta kemur fram í orðsendingu til ráðherrafundarins frá írsku sendinefndinni en texti hennar birtist á vefsíðunni http://www.fiskebat.no föstudaginn 13. júlí.

Orðsendingin er tæpar þrjár blaðsíður. Í upphafi hennar er vakin athygli á því að sé makríll veiddur í samræmi við vísindalega ráðgjöf á Norðaustur-Atlantshafi sé verðmæti hans um 1 milljarður evra og hlutur ESB rúmlega 600 milljónir evra. Því er haldið fram að aðgæsla við veiðar hefðbundinna strandríkja, ESB og Noregs auk Færeyja til 2009 hafi styrkt stofninn og valdið því hann leitaði inn í íslenska lögsögu 2008 til 2011.

Bent er á að síðan 2008 hafi Íslendingar gerst sekir um ábyrgðarlausar makrílveiðar og hafi þær náð hámarki 2011 þegar 150.000 tonnum hafi verið landað, 23% af ráðlögðum heildarafla.

Sagt er frá því að á þremur árum hafi verið reynt að ná samningum á 13 fundum. Íslendingar og Færeyingar hafi neitað að taka þátt í sameiginlegri stjórn veiðanna með ESB og Norðmönnum. Síðasta tilboð til þeirra hafi verið 7,5% til Íslendinga og 8% til Færeyinga og hafi þeim verið hafnað í febrúar 2012.

Framkvæmdastjórn ESB hafi brugðist við framferði Íslendinga og Færeyinga með því að leggja fram tillögur að nýjum refsireglum sem ESB-þingið og ráðherraráð ESB hafi nú samþykkt.

Fullyrt er að niðurstöður rannsókna fyrr á þessu ári (International Ecosystem Survey in the Nordic Seas survey April – June 2012) sem hafi verið lagðar fyrir Alþjóðahafrannsóknarráðið (ICES) sýni verulegan samdrátt í magni makríls innan íslenskrar lögsögu á árinu 2012 miðað við 2011. Þetta komi heim og saman við mælingar sem sýni að Noregshaf sé að kólna auk þess sem makrílafli íslenskra skipa sé minni árið 2012 en 2011. Þetta bendi til þess að dreifing makríls í íslenskri lögsögu sé að komast í „eðlilegt horf“.

Írsk stjórnvöld segja að tímabundin, aukin sókn makríls í lögsögu Færeyja og Íslands á árunum 2008 til 2011 hafi réttlætt umræður um að auka veiðihlutdeild þessara þjóða en á árinu 2012 sé algjörlega óréttlætanlegt að láta undan kröfum þjóðanna um aukna hlutdeild, þessar kröfur sé hvorki unnt að rökstyðja með því að vísa til magns, líffræðilegra né svæðisbundinna raka.

Með vísan til þessa og þess að ráðgerður sé fundur sjávarútvegsráðherra Íslands og Noregs og sjávarútvegsstjóra ESB í London 3. september 2012 til að leysa deiluna á pólitískum grunni hvetja Írar til þess að Íslendingar verði ekki verðlaunaðir fyrir tækifærismennsku sína og ofveiði með jafn háu boði og lagt fram í Reykjavík í febrúar þegar þeim var boðin 7,5% hlutdeild. Þetta boð eigi því síður við núna en þá þegar í ljós hafi komið að makríllinn sé á leið út úr íslenskri lögsögu.

Fara Írar fram á að samningsafstöðu ESB verði tafarlaust breytt og tilboðið frá því í febrúar dregið til baka. Þá hvetja þeir til að gripið verði til refsiaðgerða sætti Íslendingar sig ekki við hóflega aflahlutdeild.