Hollande skammar Peugeot fyrir uppsagnir

Launakostnaður í Frakklandi 14% hærri en í Þýzkalandi

François Hollande

Francois Hollande, hinn nýkjörni forseti Frakklands,skammaði forráðamenn Peugeot bílasmiðjanna í gær fyrir boðaðar uppsagnir 6500-8000 starfsmanna og hvatti þá til að endurskoða afstöðu sína. Hollande sakaði stjórnendur fyrirtækisins um lygar og að fresta tilkynningu um uppsagnir af ásettu ráði fram yfir forsetakosningar og þingkosningar. Hann kvaðst mundu leggja hart að fyrirtækinu að halda áfram niðurskurði kostnaðar með öðrum hætti. Þessi ummæli Hollande komu í sjónvarpsviðtali í gær á Bastilludaginn.

Sérfræðingar á vegum ríkisstjórnarinnar munu yfirfara áætlanir fyrirtækisins og meta lögmæti aðgerða þess. Hollande sagði að samtöl sérfræðinga við fyrirtækið mundu snúast um að koma í veg fyrir uppsagnir en einnig leita annarra kosta fyrir starfsmenn.

Wall Street Journal segir að Peugeot eigi við sama vanda að stríða og aðrar bílasmiðjur í Evrópu, sala hefur minnkað fjögur ár í röð. Fyrirtækin standa uppi með fleiri samsetningarverksmiðjur og starfsmenn en þau þurfa á að halda.

Hlutabréfaverð í Peugeot féll svo mikið á föstudag að það hefur ekki verið lægra í aldarfjórðung. Hollande hafnaði kröfum aðalforstjóra Peugeot um að launakostnaður í Frakklandi yrði lækkaður en hann nemur nú 34,10 evrum á klukkustund og er 14% hærri en í Þýzkalandi og nær 20% hærri en meðaltalið í evruríkjunum. Hollande sagði að það væri of auðvelt að benda á launakostnað.

Fyrir kosningar samþykkti franska þingið hækkun virðisaukaskatts um 1,6% og var markmiðið að gera ríkinu kleift að lækka launatengd gjöld. Ríkisstjórn Hollande hefur horfið frá þeirri hækkun vsk., sem átti að taka gildi í september og hefur í þess stað áform um að hækka annan skatt, sem snertir bæði einstaklinga og fyrirtæki.