ESB-dómstóllinn: Flugfarþegar skulu hafa rétt til að ákveða aukagjöld sjálfir

Þeir sem selja flugfarmiða á netinu verða að birta lokaverð með álögum og aukagjöldum en mega ekki hafa gjald fyrir forfallatryggingu sem hluta af lokaverði þótt kaupanda sé gefinn kostur á að taka ekki trygginguna og losna þar með við gjaldið.

Þetta er niðurstaða ESB-dómstólsins sem var birt fimmtudaginn 19. júlí. Það var neytendaverndarhópur í Þýskalandi sem skaut málinu til dómstólsins í Lúxemborg og stefndi þar ebookers.com Deutschland sem selur flugfarseðla á netinu.

Þegar viðskiptavinir netsölufyrirtækisins bókuðu miða á netinu fengu þeir tilkynningu um verð flugferðarinnar með sköttum og gjöldum auk forfallatryggingar, iðgjaldið var reiknað sjálfkrafa.

Neðst á vefsíðunni birtist tilkynning um hvernig viðskiptavinur skyldi haga sér ef hann vildi ekki kaupa forfallatrygginguna en verð hennar var eins og áður segir fellt sjálfkrafa inn í kostnaðartöluna sem birtist viðskiptavininum.

ESB-dómstóllinn sagði að viðskiptavinir ættu að hafa leyfi til að ákveða sjálfir hvort þeir vildu kynna sér kostnað við þjónustuþætti „sem falla hvorki undir skyldu né eru nauðsynlegir vegna flugsins“.

„ESB lög krefjast þess að gerð sé grein fyrir slíkum aukakostnaði á skýran, gegnsæjan og ótvíræðan hátt við upphaf hverrar bókunar og það sé undir ákvörðun viðskiptavinar komið hvort hann ákveður að greiða þennan kostnað,“ segir í niðurstöðu ESB-dómaranna.