Mitt Romney mislagðar hendur í London - Boris Johnson hendir gaman að honum

Mitt Romney og David Cameron í Downingstræti 10 26. júlí 2012.

Forsetaframbjóðendur í Bandaríkjunum sem ekki hafa látið að sér kveða á alþjóðavettvangi leggja gjarnan land undir fót áður en lokaslagurinn hefst á heimavelli til að ræða við erlenda ráðamenn. Mitt Romney, frambjóðandi repúblíkana, er á slíku ferðalagi núna. London er fyrsti viðkomustaður hans í vikuferð til Bretlands, Ísraels og Póllands. Ýmislegt hefur farið í handaskolum nú þegar vegna ferðarinnar og er bent á að annað yfirbragð sé á henni eða ferð Baracks Obama um þetta leyti fyrir fjórum árum þegar honum var fagnað í Evrópu eins og rokkstjörnu og tugir þúsunda hlýddu á ræðu hans í Tiergarten í Berlín.

Mitt Romney hafði ekki stigið úr flugvél sinni Bretlandi þegar menn tóku að velta fyrir sér hvaða stefnu hann boðið. The Daily Telegraph birti ummæli eftir aðstoðarmanni Romneys sem hafa verið lögð út á þann veg að í þeim mætti finna vott af kynnþáttaóvild. „Við deilum sömu engil-saxnesku arfleifðinni og Mitt Romney telur að hið sérstaka samband (við Bretland) hafi einstakt gildi [...] Í Hvíta húsinu hafa menn greinilega ekki tekið mið af sögunni sem við deilum hvor með öðrum,“ sagði ráðgjafi Romneys við blaðið. Forsetaframbjóðandinn lýsti tafarlaust vanþóknun sinni á ummælunum. Demókratar gátu hins vegar ekki látið hjá líða að færa sér þau í nyt. David Axelrod, kosningaráðgjafi forsetans, sagði ummælin „ótrúlega hrollvekjandi“.

Mitt Romney var framkvæmdastjóri vetrarólympíuleikanna þegar til þeirra var efnt í Salt Lake City árið 2002 og hefur nýtt velgengni sína í því starfi sem mikilvægan þátt í forsetakosningabaráttu sinni. NBC-sjónvarpsstöðin birti viðtal við Romney sem tekið var fyrir komuna til London. Þar vakti hann máls á því að Bretum gengi illa að manna öryggisgæslu auk þess sem hótun landamæravarða um verkfall vekti auðvitað ekki bjartsýni.

„Það er erfitt að átta sig á því hvernig þetta mun allt fara,“ sagði Romney og vísaði þar til Ólympíuleikanna sem hefjast í London föstudaginn 27. júlí.

David Cameron, forsætisráðherra Breta, brást við ummælum Romneys með því að hrósa því hve vel væri staðið að málum vegna leikanna í London og það væri auðveldara skipuleggja Ólympíuleikana „in the middle of nowhere“ – þar sem enginn er á ferð. Ummælin eru túlkuð með vísan til forystu Romneys vegna leikanna í Salt Lake City árið 2002. Það væri aðdáunarvert að geta skipulagt Ólympíuleikana í hjarta London, sagði Cameron.

Eftir fund með Cameron í Downing-stræti 10 sagði Romney að búast mætti við mistökum og hann væri viss um að leikarnir í London yrðu glæsilegir. „Reynsla mín af því að skipuleggja Ólympíuleikana segir mér að það eru alltaf einhverjir hnökrar fyrsta daginn eða svo,“ sagði Romney og bætti við að það væri unnt að kippa þeim í liðinn og þeir hyrfu í skuggann fyrir afrekum íþróttamannanna.

Undir kvöld fimmtudaginn 26. júlí var hlaupið með Ólympíukyndilinn um götur London til hátíðarhalda í Hyde Park þar sem tugir þúsunda manna komu saman. Boris Johnson borgarstjóri flutti ávarp og sagði:

„Ég heyri að einhver gaur að nafni Mitt Romney vilji fá að vita hvort við séum tilbúin. Erum við tilbúin? Erum við tilbúin? Já, við erum það!“

Tók mannfjöldinn duglega undir með borgarstjóranum.

Þegar fréttir af framgöngu Romneys bárust til Bandaríkjanna sögðu stuðningsmenn hans að það sem gerst hefði í London skipti engu fyrir kosningabaráttuna heima fyrir. „Við höfum ekki áhyggjur af fyrirsögnum í útlöndum, við höfum áhyggjur af kjósendum hér heima í Ameríku,“ sagði Bobby Jindal, ríkisstjóri í Louisiana, einn helstu stuðningsmanna Romneys.

Bandarískar sjónvarpsstöðvar gerðu sér hins vegar mikinn mat úr því sem laut að ferð Romneys til London. Harry Reid, leiðtogi meirihluta demókrata í öldungadeild Bandaríkjaþings, var ómyrkur í máli:

„Það er ekki gott fyrir land okkar – þetta er ekki gott fyrir hann – en fyrir landið að senda einhvern sem er tilnefndur frambjóðandi annars höfuðflokksins úr landi til að móðga alla,“ sagði Reid við Huffington Post.

Mitt Romney hitti einnig Tony Blair, fyrrverandi forsætisráðherra Breta, sem nú leiðir tilraunir til að semja frið fyrir botni Miðjarðarhafs. Þá ræddi Romney við Ed Miliband, leiðtoga Verkamannaflokksins.

Romney sagðist einnig hafa rætt við yfirmann MI6, það er leyniþjónustu Breta sem sinnir njósnum utan Bretlands. Er mjög óvenjulegt að sagt sé frá slíkum fundum.

Romney sat einnig fjáröflunarkvöldverð og er talið að hann hafi safnað þar um 2 milljónum dollara í kosningasjóð sinn. Hann verður við setningu Ólympíuleikana að kvöldi föstudags 27. júlí og heldur til Ísraels laugardaginn 28. júlí.