Framkvæmda­stjórn ESB ræðst gegn þjóðum sem hún telur stunda ofveiði - lækkar veiðiheimildir þeirra

Framkvæmdastjórn ESB sagði miðvikudaginn 1. ágúst að hún hefði refsað ríkjum sem hefðu veitt umfram heimildir árið 2011 með því að minnka veiðiheimildir þeirra í ár, aðgerðirnar koma harðast niður á Bretum og Spánverjum.

© Corey Arnold and OCEAN2012

Í yfirlýsingu sem gefin var af þessu tilefni sagði framkvæmdastjórnin að virkasta úrræði hennar til að bæta úr tjóninu sem unnið hefði verið með ofveiði árið 2011 væri að stuðla að því að allar ESB-þjóðir stunduðu sjálfbærar veiðar.

Í fyrsta sinn í ár var ákveðið að auka niðurskurð um 50% hjá þeim þjóðum sem hafa hvað eftir annað veitt umfram heimildir úr sama fiskstofni á undanförnum þremur árum.

Maria Damanaki sjávarútvegsstjóri sagði að enginn þyrfti að fara í grafgötur um að hart yrði tekið á ofveiði. Öllum bæri að fara að settum reglum í einu og öllu. Markmið hennar væri að beita reglunum á þann veg að sjálfbærni fiskstofna innan ESB-lögsögu yrði tryggð til langs tíma.

Tíu þjóðir sæta refsingu að þessu sinni. Harðast bitnar hún á Spánverjum, veiðiheimild þeirra á makríl minnkar um 12.406 tonn og ansjósu um 962 tonn. Heimild Breta til að veiða makríl verður skert um 6.439 tonn og síld um 200 tonn.

Aðrar þjóðar sem sæta refsingu eru: Danir, Frakkar, Þjóðverjar, Írar, Litháar, Hollendingar, Pólverjar og Portúgalir.

Framkvæmdastjórn ESB telur að Íslendingar hafi stundað ofveiði á makríl í ár og undanfarin tvö ár. Hún hefur farið fram að fá heimildir til að refsa Íslendingum fyrir þessar veiðar þótt þeir séu ekki innan ESB. Reglurnar taka gildi haustið 2010.