Jóhanna Sigurðar­dóttir sakar ráðherra VG um „panik-viðbrögð“ vegna ESB-viðræðnanna - segir enga ástæðu til að breyta um stefnu

Jóhanna Sigurðardóttir forsætisráðherra hafnar öllum óskum frá vinstri-grænum (VG) um breytingar á ESB-umsóknarferlinu og segir um „panik-viðbrögð“ að ræða hjá þeim. Í viðtali við fréttastofu ríkisútvarpsins mánudaginn 13. ágúst sagði hún að ekki væri „skynsamlegt að hætta [ESB-]viðræðum í miðju ferli“. Björn Valur Gíslason, þingflokksformaður VG, telur enga sérstaka þörf á að ræða ESB-málið við Samfylkinguna.

Jóhanna Sigurðardóttir.

Í Morgunblaðinu mánudaginn 13. ágúst segir að átta af 12 þingmönnum VG vilji staldra við og meta stöðuna í ESB-aðildarviðræðunum í ljósi aðstæðna innan ESB og hve viðræðurnar hafi dregist á langinn. Þessarar skoðunar séu allir þingmenn flokksins nema Steingrímur J. Sigfússon, formaður flokksins, Björn Valur Gíslason, formaður þingflokksins, Árni Þór Sigurðsson, formaður utanríkismálanefndar alþingis, og Þráinn Bertelsson, sem gekk í flokkinn eftir kosningar en hann var kjörinn á þing undir merkjum Borgarahreyfingarinnar.

Morgunblaðinu tókst að ná sambandi við Steingrím J. sem er í sumarleyfi. Í blaðinu segir að flokksformaðurinn hafi vísað „á aðstoðarmenn sína. Þeirra væri að meta hvort tilefni væri til þess að formaðurinn gæfi kost á viðtali í fríi sínu. Leitað var til aðstoðarmanns sem kom erindinu áleiðis en lengra náði málið ekki. Árni Þór Sigurðsson, formaður utanríkismálanefndar, kvaðst ekki mundu ræða við fjölmiðla vegna málsins,“ segir Baldur Arnarson, blaðamaður Morgunblaðsins.

Á ruv.is mánudaginn 13. ágúst segir að Steingrímur J Sigfússon hafi þrátt fyrir ítrekaðar tilraunir ekki viljað veita fréttastofu viðtal vegna málsins en hann sé í fríi í Frakklandi.

Jóhanna Sigurðardóttir liggur ekki á skoðunum sínum á viðhorfi meirihluta þingflokks VG og sagði við ríkisútvarpið:

„Breytingar á þessu umsóknarferli hefur aldrei verið rætt milli stjórnarflokkanna og ég tel ekki skynsamlegt að hætta viðræðum í miðju ferli. Það hefur alltaf verið markmiðið að haga málum þannig að það væri þjóðin sem ætti síðasta orðið þegar samningur lægi fyrir. Og það hefur aldrei verið neitt tímasett eða frá því gengið að samningum ætti að ljúka á þessu kjörtímabili þótt að slíkt væri auðvitað æskilegt.

Ég tel bara ekki rétt að fara að beygja eitthvað af leið eða hætta samningaviðræðum út af einhverjum „panik- viðbrögðum“ hjá sem eru uppi núna.“

Fréttamaður spurði Jóhönnu hvort hún teldi um kosningaskjálfta hjá VG að ræða og svaraði hún: „Þeir líta á málin út frá sínum sjónarhóli en ég sé ekkert sem gerir það að verkum að við þurfum að hætta núna í miðju ferli.“

Fréttastofa ríkisútvarpsins náði í Björn Val Gíslason, þingflokksformann Vinstri grænna. Hann tekur jafnan af skarið á þann veg sem fellur að skoðun Steingríms J. Sigfússonar en þeir eru báðir þingmenn fyrir norðaustur kjördæmi. Björn sér enga sérstaka ástæðu til að ræða ESB-málið við Samfylkinguna. Honum kemur þó afstaða félaga sinna ekki á óvart og segir á ruv.is:

„Mér vitanlega hefur ekkert gerst eða komið upp á sérstaklega sem gerir það að verkum að grípa þarf til einhverra róttækra ráðstafana í þessu máli nú þegar. Það kann hinsvegar að vera að þær liggi fyrir einhversstaðar en þær hafa ekki borist hingað til mín.

En ef það er vilji til þess að gera það og fólki langar sérstaklega til þess að þá er ekkert mál að setjast niður og fara yfir málið.“