Noregur: Hvatt til aukinnar öryggisgæslu í ljósi fjöldamorðanna 22. júlí - aukafundar krafist í stórþinginu - Stoltenberg sætir gagnrýni

Jens Stoltenberg - norska blaðið VG krefst afsagnar hans.

Rannsóknarnefnd á voðaverkum Breiviks í Ósló og Útey 22. júlí 2011 skilaði skýrslu mánudaginn 13. ágúst. Þar er að finna harða gagnrýni á yfirvöld norskra öryggismála og þó sérstaklega lögregluna vegna aðgæsluleysis og skorts á réttum viðbrögðum. Jens Stoltenberg, forsætisráðherra Noregs, viðurkennir að lokaábyrgðin á pólitískum vettvangi hvíli á sínum herðum. Þess er krafist að hann segi af sér embætti en hann hafnar því. Óskað hefur verið sérstaks fundar í norska stórþinginu til að ræða skýrsluna og viðbrögð við henni.

Í áliti rannsóknarnefndarinnar kynnir hún 31 tillögu um það sem betur má fara innan norskrar stjórnsýslu og á sviði öryggismála. Telur nefndin brýnt að öllum tillögum hennar sé hrundið tafarlaust í framkvæmd.

Mikilvægustu tillögurnar eru:

• Það verði refsivert að hljóta hryðjuverkaþjálfun, hálfsjálfvirk vopn verði bönnuð og eftirlit verði hert með vopnum og efnum til sprengjugerðar.
• Efla verði getu lögreglunnar til að takast á við erfið verkefni, búa verður stjórnstöðvar og manna til að þær geti sinnt mikilvægu hlutverki sínu og það verður að koma á fót öflugri þyrlusveit á vegum lögreglunnar í Ósló.
• Þar til nýju neyðarkerfi hefur verið komið á fót verður að huga að bráðabirgðalausnum sem fullnægja kröfum.
• PST, norska leyniþjónustan, verður að sýna meira frumkvæði og vilja til samstarfs við aðra aðila. Innan PST verður að ríkja meira hugmyndaflug og vilji til að greina nýjar hættur. PST verður að sýna meira sjálfstæði við að koma upp um og koma í veg fyrir nýjar árásir og verður að fyrra bragði að vara ríkisstjórn og önnur stjórnvöld við sé hætta talin á ferðum.
• Endurskoða ber reglur um þagnarskyldu innan heilbrigðiskerfisins til að tryggja að lögregla og aðrir sem hlut eiga að máli geti fengið nauðsynlegar upplýsingar þegar voðaverk eru unnin eða aðrir voðaatburðir verða, auk þess sem PST og leyniþjónusta hersins geti miðlað meiri upplýsingum.

Nefndin leggur til að allir forstöðumenn innan stjórnsýslunnar leggi sig skipulega fram um að styrkja eigin árvekni og stofnana sinna gagnvart hugsanlegum hættum. Öryggismálanefnd ríkisstjórnarinnar og „krísuráðið“ hittist reglulega til að ræða stöðu mála og kynna sér hættumat með það fyrir augum að tryggja góða samhæfingu og viðbrögð í ljósi ríkjandi stöðu á hverjum tíma.