Merkel vill fara hægt vegna banka­sambands ESB - ágreiningur við Frakka - hægir á þýskum hagvexti

Angela Merkel Þýskalandskanslari sagði þriðjudaginn 25. september að ekki ætti að sýna neitt óðagot við að koma á fót bankasambandi. Með ummælum sínum snerist Merkel gegn kröfum frá framkvæmdastjórn ESB og ráðamönnum í Frakklandi um að koma sem allra fyrst á ESB-bankaeftirliti sem síðan gæti mælt fyrir um aðstoð við banka í vandræðum. AFP-fréttastofan segir að þetta sýni að Þjóðverjar telji enn verulega hættu á ferðum vegna ástandsins á Grikklandi og Spáni.

„Ég styð öflugra bankaeftirlit á evru-svæðinu,“ sagði kanslarinn á fundi Þýskra atvinnurekenda (BDI) í Berlín. „Evrópskt eftirlit verður einnig að verða meira bindandi – ég get ekki talað um beina endurfjármögnun banka í öðrum löndum ef ég hef ekki áður skapað heimild til íhlutunar,“ sagði hún og tóku fundarmenn undir orð hennar með lófataki.

Hún lagði áherslu á að farið yrði skref fyrir skref og ekki of hratt og ekki ætti að standa þannig að málum að menn stæðu og segðust hafa gert „eitthvað“.

Á fundi leiðtoga ESB í júní var ákveðið að nota mætti björgunarsjóð evrunnar milliliðalaust til að endurfjármagna banka í vandræðum eftir að komið hefði verið á heildar-bankaeftirliti fyrir ESB undir forystu Seðlabanka Evrópu. Síðustu daga hefur komið í ljós að ágreiningur er um hvernig staðið skuli að framkvæmd málsins. François Hollande Frakklandsforseti sagði um helgina að „.því fyrr því betra“ þegar hann ræddi bankaeftirlitið.

Í Þýskalandi sjást merki um að kreppan á evru-svæðinu hafi neikvæð áhrif á efhag landsins. Í ræðu sinni hjá BDI sagði Merkel að Þjóðverjar mættu ekki ímynda sér að þeir yrðu ekki fyrir barðinu á skuldakreppunni.

Traust þýskra neytenda er að dala segir greiningarfyrirtækið GfK þriðjudaginn 25. september en daginn áður kom fram í Ifo-viðskiptakönnun að fimmta mánuðinn í röð gætti samdráttar og hefur vísitalan aldrei verið lægri síðan í febrúar 2010.

„Þýskaland er ekki eyja heldur öflugt útflutningsland og verður ekki slitið frá þróun í umheiminum og efnahag Evrópu,“ sagði Merkel. „Okkur er skylt að gera eins mikið og unnt er til að viðhalda eftirspurn á heimamarkaði í Þýskalandi svo að við getum ýtt á öflugan hátt undir vöxt á evru-svæðinu.“

Fréttir af evru-svæðinu lofa ekki góðu. Lántökukostnaður Spánverja og Ítalíu hækkar og í Frakklandi birtist niðurstaða könnunar þriðjudaginn 25. september sem sýnir að svartsýni atvinnurekenda er hin mesta sem hún hefur verið síðan 2010.

Angela Merkel og Mario Draghi, forseti bankastjórnar Seðlabanka Evrópu, hittast á fundi í Berlín þriðjudaginn 25. september. Þá efna fjármálaráðherrar þriggja ríkja: Þýskalands, Finnlands og Hollands til fundar í Helsinki til að ræða stöðuna á evru-svæðinu en löndin njóta hæstu lánshæfiseinkunna evru-ríkja.