Fjármála­ráðherra Breta segir hlustað á þingmenn vegna ESB-fjárlaga - prófraunin sjálf sé eftir ár

George Osborne, fjármálaráðherra Bretlands, segir að raunverulega muni reyna á vald ríkisstjórnarinnar þegar tillaga um efni fjárlaga ESB verði lagt fyrir breska þingið. Ráðherrann lét þessi orð falla í samtali við BBC eftir að ríkisstjórn Davids Camerons hafði orðið undir í atkvæðagreiðslu um stefnu Breta í viðræðunum um ESB-fjárlög á árunum 2014 til 2020. Ráðherrann sagði að ríkisstjórnin mundi ekki leggja aðra tillögu fyrir þingið en þá sem hún teldi hagstæða fyrir breska skattgreiðendur.

David Cameron og George Osborne

Verkamannaflokkurinn segir að David Cameron hafi verið niðurlægður í atkvæðagreiðslunni. Ed Miliband, leiðtogi Verkamannaflokksins, er hins vegar sakaður um hræsni og tækifærismennsku af forystumönnum ríkisstjórnarinnar. Nick Clegg, vara-forsætisráðherra og leiðtogi Frjálslynda flokksins, sagði að Verkamannaflokkurinn gerði sér fullkomna grein fyrir að ekki yrði unnt semja um niðurskurð á ESB-fjárlögunum.

„Hin nýja stefna þeirra er óheiðarleg, hún er hræsnisfull. Verst af öllu er þó að áform Verkamannaflokksins mundu reynast skattgreiðendum dýrari en ekki ódýrari,“ sagði Clegg.

Talsmenn Verkmannaflokksins segja að á hans vegum hafi verið unnið að lækkun útgjalda ESB frá því í júlí. Ed Ball, skugga-fjármálaráðherra, segir að menn úr öllum flokkum hafi stutt tillögu um samdrátt ESB-útgjalda á tímum niðurskurðar á heimavelli.

„Þetta snýst ekki um flokkspólitík heldur þjóðarhagsmuni. Þingmenn hafa lýst skoðun sinni og nú verður David Cameron að hlusta og sýna hvað í honum býr,“ segir Ball.

Niðurstaðan í atkvæðagreiðslunni 31. október þar sem ríkisstjórnin varð undir bindur ekki hendur Davids Camerons á vettvangi ESB en hún hefur vakið sambanburð við ríkisstjórn flokksbróður hans Johns Majors sem tættist í sundur vegna ágreinings um Evrópumál á tíunda áratugnum.

Fjármálaráðherrann sagði að ríkisstjórnin mundi hlusta á alla þingmenn Íhaldsflokksins og stuðningsmenn ríkisstjórnarinnar á þingi og neitaði að útiloka lækkun á ESB-útgjöldum, viðræður um þau væru rétt að hefjast. Hann lagði áherslu á að fyrst reyndi á samskipti ríkisstjórnarinnar og þingmanna um þetta mál eftir um það bil ár þegar að því kæmi að samþykkja samning sem ríkisstjórnin gerði í Brussel.

Í forsætisráðuneytinu í Downingstræti vildu menn sem minnst úr uppreisn þingmanna gera og sögðu hana „síður en svo undrunarefni“. Í Brussel væru ríki alls ekki á einu máli um efni ESB-fjárlaganna að sögn sendiherra Breta þar eftir fund hans með starfsbræðrum sínum miðvikudaginn 31. október