Grikkland: Hætta á greiðslufalli eftir viku-Ágreiningur meðal lánardrottna

Grikkir eiga að borga 5 milljarða evra af skuldum sínum á föstudag í næstu viku og Financial Times segir að ekki sé ljóst, hvort það takist. Ástæðan er sú, að alþjóðlegir lánardrottnar Grikklands hafa ekki komið sér saman um endurskoðun á björgunarlánum til Grikkja, sem m.a. felst í að framlengja í tvö ár þann tíma, sem Grikkir fá til að kom umbótum í framkvæmd. Á mánudag verður fundur fjármálaráðherra evruríkja í Brussel og til stóð að þar yrði tekin ákvörðun um að greiða út 31,3 milljarða evra, sem er hluti af þeim lánapakka, sem Grikkir hafa samið um. En lánardrottnum hefur mistekizt að ná samkomulagi sín í milli um hver eigi að taka á sig byrðar af lægri endurgreiðslum lána en áður hafði verið gert ráð fyrir.

Einn þeirra, sem við sögu koma í þessum viðæðum segir við Financial Times að ljóst sé að frekari viðræður verði að fara fram eftir ráðherrafundinn á mánudag. Ofannefnd greiðsla á að fara til Seðlabanka Evrópu, sem hefur neitað um framlengingu og þar með lagt aukinn þrýsting á aðra lánardrottna að ná samkomulagi sín í milli. FT segir ágreining milli Alþjóða gjaldeyrissjóðsins og framkvæmdastjórnar ESB. AGS er svartsýnni á stöðu Grikklands en framkvæmdastjórnin.

Í FT kemur fram að verði framkvæmdastjórnin að falllast á mat AGS þýði það tap fyrir önnur evruríki en stjórnvöld í Berlín og öðrum evruríkjum í Norður-Evrópu hafa hafnað þeirri leið af ótta við reiði kjósenda.