Varnaðarorð vegna efnahagsframvindu í Þýskalandi - spáð er stöðnun eða samdrætti

Hagvöxtur í Þýskalandi var 0,2% í júlí til september 2012. Þessi nýja tala frá þýsku hagstofunni sýnir að vöxtur er minni í öflugasta hagkerfi ESB en áður og er samdrátturinn rakinn til skuldavandans á evru-svæðinu.

Fjármálahverfið í Frankfurt.

Á öðrum ásrfjórðungi 2012 var vöxturinn 0,3% og 0,5% á hinum fyrsta. Destastis, þýska hagstofan, segir að vöxtin megi einkum rekja „til erlendrar eftirspurnar“.

Í Frakklandi jókst verg landsframleiðsla um 0,2% á þriðja árfjórðungi miðað við annan ársfjórðung en Insee, franska hagstofan, segir 0,1% samdrátt hafa verið á fyrri ársfjórðungum 2012.

Umsvif á sviði vöru og þjónustu jukust í Frakklandi „eftir fimm ársfjórðunga stöðnun“ sagði Insee.

Chirstian Schultz, hagfræðingur við Barenberg-banka, sagði við BBC að tölurnar frá Frakklandi og Þýskalandi væru betri en vænst hefði verið. Hann benti þó á að tölurnar vísuðu til liðins tíma. Nú beindist athygli að fjórða árfjórðungi 2012 og tölur sem mætti skoða um framvindu á líðandi stundu lofuðu ekki góðu.

Jörg Krämer, greinandi hjá þýska Commerzbank, sagði Reuters að líklega mundi verða samdráttur í Þýskalandi á næstunni og efnahagslífið næði sér ekki á strik að nýju fyrr en á síðari helmingi næsta árs. Gustav Horn, hagfræðingur hjá Macroeconomic Policy Institute (IMK), sagði Reuters að Þjóðverjar kynnu ef til vill að verða að horfast í augu við samdrátt þar sem nýjar tölur sýndu að þýsk fyrirtæki hefðu hætt að fjárfesta í framleiðslutækjum.

Þýska ríkisstjórnin breytti þjóðhagsspá sinni fyrir árið 2013 fyrir skömmu og lækkaði spá um hagvöxt úr 1,6% í 1% vegna samdráttar á evru-svæðinu og minni hagvaxtar í Asíu og Suður-Ameríku.

Verg landsframleiðsla í Þýskalandi óx um 4,2% árið 2010 og 3% árið 2011.

Greiningardeild Natixis-banka segir að neiðkvæðar hagtölur síðustu vikna og mánaða gætu bent til samdráttar í stað vaxtar. Þjóðverjar hafa almennt staðið best að vígi gagnvart vandanum sem steðjar að evru-þjóðunum 17. Þeir hafa hagnast af veikri stöðu evrunnar. Hún hefur auðveldað þeim samkeppni á alþjóðamörkuðum. Einkaneysla hefur ekki minnkað í Þýskalandi og sömu sögu er að segja um samneyslu.

Í súðustu viku birtust tölur sem sýna að 0,3% samdráttur var á Spáni á þriðja ársfjórðungi og 0,8% í Portúgal. Grikkir tilkynntu mánudaginn 12. nóvember að miðað við sama tíma í fyrra væri samdráttur í ár 7,2%. Þar kom ekki fram hver staðan væri milli ársfjórðunga á árinu 2012.

Heimild: BBC og dw.de