Frakkland: Moody´s lækkar lánshæfismatið

Matsfyrirtækið Moody´s ákvað mánudaginn 19. nóvember að lækka lánshæfismat á Frakklandi, fella það úr efsta flokki vegna þess að dregið hefði úr samkeppnishæfni þess. Litið er á lækkunina sem áfall fyrir François Hollande Frakklandsforseta og efnahagsstefnu hans sem reist er á að hækka skatta í því skyni að auka hagvöxt.

Matsfyrirtækið Standard&Poor´s lækkaði mat sitt á Frakklandi þegar í janúar á þessu ári á meðan Nicolas Sarkozy var enn forseti. Moody´s sagði að rekja mætti niðurstöðu sína til „varanlegrar minnkunar á samkeppnihæfni“ Frakklands og „gamalgróins stirðleika á vinnu-, vöru- og þjónustumörkuðum“.

Fyrr í mánuðinum spáði Alþjóðagjaldeyrissjóðurinn að Frakkar kynnu að dragast aftur úr Ítölum og Spánverjum með tilliti til aðstæðna á vinnumarkaði og samkeppnishæfni. Útflutningur Frakkar dregst saman í samanburði við aðrar evru-þjóðir, einkum Þjóðverja.

Í nýjasta hefti The Economist er Frakklandi líkt við „tímasprengju í hjarta Evrópu“ vegna þess hvernig á efnahagsmálum er haldið og ekki hafi tökin batnað eftir að sósíalistar komust til valda fyrr á árinu.

Pierre Moscovici, fjármálaráðherra Frakka, sagði að lækkun Moody´s „drægi ekki grundvölld fransks efnahags í efa og [væri] hvatnig til að vinna að kerfisbreytingum“.