Ögmundur Jónasson segir síðari tilmæli Huangs Nubos afgreidd út af borðinu - Huang er nú „öskureiður“

Sigurður Bogi

Ögmundur Jónasson

Ögmundur Jónasson innanríkisráðherra sagði í Reykjavík síðdegis á Bylgjunni mánudaginn 3. desember að enginn þyrfti að efast um að síðari tilmælum Huangs Nubos um leigu á Grímsstaða á Fjöllum hefði verið hafnað. Málið væri út af borðinu, þessi tilraun Huangs væri út af borðinu. Þá sagði hann að háttalag Huangs gagnvart íslenskum yfirvöldum væri „byrjað að vera dálítið leiðigjarnt“ en stjórnvöld tækju „faglega“ á málinu. Enginn þurfi að velkjast í vafa um niðurstöðuna. Huang segist ekki hafa fengið nein svör frá Íslandi.

Huang Nubo, eigandi Beijing Zhongkun Investment Group Co, kínverski auðmaðurinn sem hefur augastað á Grímsstöðum á Fjöllum, sagði í frétt sem birtist á vefsíðu Bloomberg sunnudaginn 2. desember að hann sé ekki hættur við áform sín á Íslandi þótt honum hafi verið ýtt til hliðar í annað sinn.

Huang segir að íslenska ríkisstjórnin hafi ekki beðið sig um að leggja fram frekari upplýsingar eða að senda inn að nýju beiðni um að taka á leigu og þróa land á Íslandi. Nubo segist ekki vita hvaða fleiri upplýsingar séu nauðsynlegar og að sér hafi ekki verið settur neinn frestur.

„Ég er öskureiður (very angry) og leiður yfir því hve slæmt fjárfestingarumhverfi er á Íslandi,“ sagði Huang í símaviðtali í Peking í dag [sunnudag 2. desember] segir á vefsíðu Bloomberg. „Ég mun ekki draga umsókn mína til baka fyrst. Ég ætla frekar að bíða og láta þá segja að þeir vilji ekki fjárfestingu mína.“

Huang Nubo

Þá er í frétt Bloomberg sagt að ráðherranefnd á Íslandi hefði ekki getað tekið lokaákvörðun um umsókn Huangs vegna skorts á upplýsingum sem tengdust áformum milljarðamæringsins um að leigja land, hann verði að sækja um að nýju til að ríkisstjórnin geti tekið afstöðu til málsins.

Bloomberg vekur athygli á að Huang sé með áform um að fjárfesta fyrir 200 milljónir dollara á Íslandi og hann hafi sagt 2. desember að hann ætli ekki að breyta þeirri fjárhæð. Í júlí hefði Huang sagt að hann hefði tryggt sér leigusamning vegna landsins.

Þá segir á Bloomberg:

„Hinn 56 ára gamli maður hafði ætlað sér að þróa ferðaþjónustustað og fjallagarð á Íslandi og þetta yrði stökkpallur vegna fjárfestinga í nágrannalöndum þar á meðal Danmörku og Svíþjóð eins og hann hafi sagt á síðasta ári. Verkefnið á Íslandi mundi ekki gefa mikið í aðra hönd en yrði gott fyrsta skref í norrænni áætlun fyrirtækisinns sagði Huang í dag.

„Það er ríkisstjórn Íslands sem bauð mér að fjárfesta; ef til vill hefði ég ekki átt að vera rómantískur heldur varkár,“ sagði Huang sem er félagi í rithöfundasamtökum Kína og hefur gefið út nokkrar ljóðabækur. Huang hefur einnig gefið 1 milljón dollara til að stofna menningarsjóðinn Kína-Ísland.

Hann ætlar að endurskoða afstöðu sína til fjárfestingarumhverfis á Norðurlöndum verði áformum hans á Íslandi endanlega hafnað.

Milljarðamæringurinn sem á eignir í Kaliforníu og Tennessee er kunnur fyrir að hafa stutt við endurreisn 200 ára gömlu þorpanna Xidi og Hongcun við Huangshan-fjall í Anhui-héraði í austurhluta Kína, þorpin eru nú á heimsminjaskrá UNESCO. Á vefsíðu Beijing Zhongkun er skýrt frá byggingum og rekstri fyrirtækisins á ferðamannastöðum nálægt þorpunum.

Tekjur Beijing Zhongkun á árinu 2011 námu 321 milljón dollurum.“

Heimild: Bloomberg