Ráðherraráð ESB: Aðlögunar­viðræður við Ísland nálgast „úrslitastig“ – aðild Íslands styrkir norðurslóða­stefnu ESB – samþykkja verður allan ESB-lagabálkinn

Ráðherraráð ESB telur að nú nálgist „úrslitastig“ í aðlögunarviðræðunum við Ísland, til þessa hafi hraðinn í viðræðunum endurspeglað aðild Íslands að evrópska efnahagssvæðinu (EES) og Schengen-samstarfinu. Ráðið áréttar að Íslendingar verði að samþykkja allan lagabálk ESB í viðræðunum, innleiða hann og hrinda í framkvæmd áður en til aðildar kemur. Þeir telja aðild Íslands mikilvæga vegna norðurslóðastefnu ESB. Þá leggja ráðherrarnir áherslu á að haldið verði áfram kynningarstarfi til að „stuðla að upplýstri almennri umræðu um aðlögunarferli Íslands og samruna með ESB“. Stækkunardeild ESB stendur að baki Evrópustofu hér á landi í þessum tilgangi.

Utanríkis- og Evrópuráðherrar ESB-ríkjanna ræddu stöðu stækkunarmála ESB á fundi í Brussel 10. og 11. desember á grundvelli framvinduskýrslu framkvæmdastjórnar ESB frá október 2012.

Ráðherrarnir fagna hinni góðu framvindu í aðlögunarviðræðunum við Ísland á liðnu ári og segja að af gangi þeirra megi eins og áður ráða hve Íslendingar standi nærri ESB vegna aðildar að evrópska efnhagssvæðinu (EES) og Schengen-samstarfinu og hve stjórnsýsla sé góð í landinu. Þeir vekja hins vegar athygli á að nú séu viðræðurnar að komast á meira úrslitastig (decisive phase). Jafnframt vaxi sameiginleg hagsmunatengsl ESB og Íslands, þar á meðal á sviði endurnýjanlegra orkulinda og loftslagsbreytinga og þegar litið sér til strategísks mikilvægis norðurslóðastefnu ESB (strategic importance of the EU's Arctic

policy).

Ráðherrarnir telja að aðild Íslands sé báðum aðilum til hagsbóta og þeir vilja að unnið sé áfram að viðræðunum í samræmi við það sem segir í viðræðuramma ESB, Íslendingar verði að standa víð skuldbindingar sínar í samræmi við EES-samninginn og taka verði m. a. fullt tillit til þess sem fram komi í niðurstöðum leiðtogaráðs ESB frá 17. júní 2010. Ráðherrarnir árétta að aðlögunarviðræðurnar miða að því að Íslendingar samþykki lagabálk ESB í heild og tryggi fulla innleiðingu og framkvæmd hans við aðild þar sem tillit sé tekið til eigin framlags Íslands og viðræðuramma ESB.

Ráðherrarnir eru sáttir við framvindu íslenskra efnahagsmála og bata þeirra inn á við. Íslendingar ættu að geta tekist á við þrýsting vegna samkeppni og markaðsöfl innan ESB á næstu árum svo framarlega sem haldið verði áfram að takast á við núverandi viðfangsefni með hæfilegum efnahagsaðgerðum og kerfisbreytingum.

Í samræmi við mótaða stefnu um stækkun ESB fagna ráðherrarnir að áfram verði unnið að kynningarmálum til að stuðla að upplýstri almennri umræðu um aðlögunarferli Íslands og samruna með ESB.

Í almennum kafla þessarar ályktunar ráðherraráðsins um stækkun ESB er lögð áhersla á að umsóknarríkjum verði gerð grein fyrir hinum víðtæku breytingum séu að verða á stjórn efnahagsmála innan ESB og hve mikill samruni hafi nú þegar orðið á þessu sviði. Þá er þvi fagnað að framkvæmdastjórn ESB ætli stig af stigi að hefja eftirlit með stjórn efnahagsmála í umsóknarríkjum.