Evrópu­ráðherra Íra segist vilja hraða aðildarviðræðum við Íslendinga - stangast á við orð sjávar­útvegs­ráðherra Íra

Írar ætla að hraða aðildarviðræðum Íslands við Evrópusambandið þegar þeir taka við forsæti í ráðherraráði ESB eftir áramótin sagði fréttastofa ríkisútvarpsins miðvikudaginn 19. desember. Þá ætla þeir einnig að hleypa nýjum krafti í aðildarviðræðurnar við Tyrki sem hafa legið í láginni um nokkurt skeið.

Lucinda Creighton

„Við stefnum að því að hraða aðildarviðræðum við Ísland og hleypa nýjum krafti í viðræðurnar við Tyrki,“ sagði Lucinda Creighton, Evrópuráðherra Írlands. Þessi afstaða ráðherrans til viðræðna við Ísland kemur á óvart í ljósi þess sem fram hefur fyrr á þessu ári um afstöðu írsku ríkisstjórnarinnar til aðildarviðræðnanna með vísan til ágreinings um makrílveiðarnar.

„Írska ríkisstjórnin hefur hert á baráttu sinni gegn sjávarútvegsstefnu Íslendinga og sagt að umsókn þeirra um aðild að ESB kunni að verða stöðvuð láti þeir undir höfuð leggjast að leysa ágreininginn vegna vaxandi makrílveiða þeirra,“ sagði Arthur Beesley, Evrópufréttaritari The Irish Times í Brussel, í blaðinu 20. mars 2012.

Í fréttinni sagði að aðildarríki ESB hefðu19. mars 2012 stigið skref til að beita Íslendinga viðskiptaþvingunum vegna makrílveiðanna. Simon Coveney, sjávarútvegsráðherra Írlands, hefði sagt að deilan vegna veiðanna kynni að spilla almennt fyrir því að viðræður um sjávarútvegsmál við Íslendinga hæfust.

Írska ríkisstjórnin teldi að stórauknar makrílveiðar Íslendinga og Færeyinga jafngiltu rányrkju á verðmætasta fiskistofni Íra í andstöðu við alþjóðalög.

Í frétt The Irish Times sagði að írski ráðherrann hefði ekki sagt afdráttarlaust að Írar myndu standa gegn því að sjávarútvegskaflinn yrði opnaður í aðildarviðræðunum við Íslendinga þegar ráðherrar ræddu málið í apríl. Coveney hefði hins vegar sagt að ekki væri unnt að hefja raunhæfar viðræður um sjávarútvegsmál án þess að deilan yrði leyst.

„Við viljum að þetta mál verði leyst og það er umtalsvert opið sár sem verður að loka áður en við getum hafið alvöru viðræður um sjávarútvegskaflann,“ sagði írski ráðherrann við blaðamenn í Brussel. „Ég er ekki að tala um neitunarvald eða eitthvað í þá veru en ég held að það sé mikilvægt fyrir okkur að “flagga„ þessu máli.“

Coveney sagði að sjónarmið Íra nytu stuðnings Breta, Spánverja, Portúgala, Frakka og Þjóðverja í ráðherraráði ESB. Hann áréttaði að hann styddi heilshugar aðild Íslands að ESB, Írar ættu margt sameiginlegt með Íslendingum og kynnu að eignast þar bandamann innan sambandsins.

„Vegna þessa máls er hins vegar mjög erfitt fyrir ESB að opna sjávarútvegskaflann í góðri trú þar sem óljóst er um niðurstöðu í jafnmikilvægu máli og makrílkrísunni eins og ég vil kalla deiluna,“ sagði ráðherrann. „Ég hef ekki farið fram á annað en þetta, annað en að segja að eigi að ræða um sjávarútvegsmál í góðri trú í aðildarviðræðunum við Íslendinga sé erfitt að gera það án þess að fyrir liggi samkomulag um makrílinn því að það setur svip sinn á viðræðurnar.“