David Cameron: Bretar hafa „full rök“ til að krefjast breytinga á ESB-aðild sinni

Bretar hafa „full rök“ til að krefjast breytinga á ESB-aðild sinni sagði David Cameron, forsætisráðherra Bretra, í BBC-viðtali við Andrew Marr sunnudaginn 6. janúar. Hann sagði að breytingar á sáttmálum ESB vegna nýrra stjórnarhátta á evru-svæðinu mundi ljúka upp dyrunum fyrir breytingum í þágu Breta.

Andrew Marr ræðir við David Cameron.

„Á þessari stundu eru að verða miklar breytingar í Evrópu vegna tilvistar evrunnar. Evru-ríkin verða að taka upp nýtt kerfi til að mynt þeirra sé nothæf,“ sagði breski forsætisráðherrann og bætti við:

„Að þeir verði að breyta kerfinu þýðir að þeir eru að breyta eðli samtakanna sem við tilheyrum. Við höfum þess vegna full rök – ekki aðeins rök heldur fáum einnig tækifæri af því að þeir þurfa breytingar – til að óska sjálfir eftir breytingum.“

Á vefsíðunni EUobserver er minnt á að með viðtalinu í BBC hafi Cameron verið að búa sig og aðra undir ræðu sem hann ætlar að flytja í janúar þar sem hann kynnir viðræðuafstöðu sína gagnvart ESB. Þótt forsætisráðherrann vilji komast hjá því að leggja mál fyrir á þann veg að Bretar segi já eða nei um ESB-aðild í þjóðaratkvæðagreiðslu á hann erfiðara um vik í því efni en áður vegna þrýstings innan eigin flokks, Íhaldsflokksins, þar sem ESB-andstaða magnast vegna fjármálakreppunnar og vaxandi stuðnings við flokk sjálfstæðissinna (UKIP). Nýjar kannanir sýna að 51% Breta vilja segja skilið við ESB en 40% eru hlynnt aðild.

Peter Mandelson úr breska Verkamannaflokknum sem á sínum tíma var viðskiptastjóri ESB skrifar grein í breska blaðið The Guardian þar sem hann lýsti afstöðu Camerons gagnvart ESB sem „efnahagslegu brjálæði“. Mendelson segir:

„Skilaboðin sem hann sendir umheiminum eru að við séum á leið frá innri markaði Evrópu og þeir sem fjárfesti í Bretlandi til að tryggja stöðu sína á þeim markaði verði að endurskoða hug sinn.“

EUobserver bendir á að Bretar hafi heimild innan ESB til að beita neitunarvaldi gegn öllum breytingum á sáttmálum ESB en Bretar verði jafnframt að hafa í huga að hvert hinna landanna 26 geti lagst gegn óskum Breta um aukin völd í eigin hendur og breytingu á sáttmálum ESB vegna þess. Meðal þess sem Cameron vill er að fjármálastofnanir í City of London þurfi ekki að lúta fjármálareglum ESB og að Bretar standi utan félagslegra skuldbindinga.