Framkvæmda­stjórn ESB: Kjötsvindlið er umbúðamál ekki heilbrigðismál

Framkvæmdastjórn ESB sagði mánudaginn 11. febrúar að uppnám vegna hrossakjöts í matvælum í ýmsum ESB-ríkjum virtist á þessu stigi mega rekja til rangra upplýsinga á umbúðum, ekki væri um matvælaöryggismál að ræða.

Lasagne frá Findus er sagt með hrossakjöti þótt naut sé nefnt á umbúðunum.

„Við erum ekki að ræða um matvælaöryggismál,“ sagði Frederic Vincent, talsmaður framkvæmdastjórnarinnar, þegar hann var spurður á blaðamannafundi um vangaveltur í Bretlandi um að banna innflutning á unnum kjötvörum.

„Enginn hefur veikst svo ég viti. Þetta snýst aðeins um umbúðamerkingar. Á þessu stigi er því alls ekki við hæfi að grípa til banns við einhverju.“

Vincent er upplýsingafulltrúi Tonios Borgs, heilbrigðismálastjóra ESB, benti á að einstökum ríkjum væri heimilt að ákveða tímabundið innflutningsbann á matvælum. Hann lagði áherslu á að ríki innan ESB væru nú „að safna staðreyndum“ um eðli þessa hneykslis á matvælamarkaði þeirra. Unnið væri að því að rekja slóð vöru til að átta sig á hver hefði gert hvað og í hve langan tíma.

Hann sagði að framkvæmdastjórnin gæti aðeins látið að sér kveða ef um heilbrigðismál væri að ræða og sannanir lægju fyrir um það. Nú nýttu viðkomandi ríki sér kerfi ESB sem heitir á ensku Rapid Alert System for Food and Feed (RASFF), hraðvirkt viðbragðskerfi vegna matvæla og fóðurs; upplýsingakerfi sem auðveldaði að rekja uppruna vöru.

Stjórnvöld í Frakklandi og Bretlandi hvöttu mánudaginn 11. febrúar til þess að „glæpamennirnir“ að baki kjötsvindlinu þar sem hrossakjöt er selt sem nautakjöt yrðu afhjúpaðir. Rúmenar höfnuðu því alfarið að rekja mætti svindlið sem tengist frosnum matvælum sem dreift hefur verið víða um ESB-lönd til sín. Töldu þeir sig hafða fyrir rangri sök.