Bretland: Miklar umræður um „bóta-ferðamenn“ og leiðir til að hefta útgjöld vegna þeirra úr félagslega kerfinu

Miklar umræður eru í Bretlandi um leiðir til að stöðva þá sem á ensku eru kallaðir „benefit tourists“, það er bóta-ferðamenn. Fólk sem kemur frá öðrum löndum til að nýta sé ókeypis heilbrigðisþjónustu, félagslegt húsnæði og aðra félagslega þjónustu hins opinbera.

Rétturinn til frjálsrar farar innan ESB/EES-svæðisins er talinn muni leiða til þess að Bretar þurfi að bera félagslegan kostnað í þágu sífellt fleiri bóta-ferðamanna frá fátækustu löndum Evrópu. Hugar breska ríkisstjórnin nú að því hvernig hún getur dregið úr bótagreiðslum til þessa fólks. Stjórnvöld geta hins vegar ekki beint aðgerðum sérstaklega gegn Rúmenum og Búlgörum. Verði réttur til bóta þrengdur verða ráðstafanirnar einnig að beinast gegn Bretum sjálfum.

Simon Heffer, dálkahöfundur í The Daily Mail, segir að innan ríkisstjórnarinnar séu þrjár leiðir til skoðunar.

Í fyrsta lagi að takmarka réttinn til félagslegs húsnæðis við heimamenn sem hafa tengsl við viðkomandi svæði.

Í öðru lagi að takmarka rétt til bóta við þá sem greitt hafa skatta eða sjúkratryggingar.

Í þriðja lagi að krefjast vottorðs um búsetu í Bretlandi áður ESB-borgarar fái ókeypis heilbrigðisþjónustu. Þetta mundi ekki aðeins setja Búlgörum og Rúmenum skorður heldur öllum útlendingum sem koma til Bretlands og fara beint á opinbert breskt sjúkrahús til lækninga.

Heffer segir stórundarlegt að eina leiðin til að bresk yfirvöld geti takmarkað bótagreiðslur til innflytjenda frá Austur-Evrópu sem ekki hafi lagt neitt af mörkum til bresks samfélags sé að takmarka það sem þau geti gert fyrir breska borgara sem margir hafi lagt sitt af mörkum.

Þá fari ekki vel á því að læknum beri að krefjast búsetuskilríkja af þeim sem óskar eftir opinberri læknisþjónustu. Mundu þeir neita að sinna alvarlega sjúkum manni vegna þess að hann geti ekki sannað að hann eigi rétt á meðferð?