Írans­forseti sætir þungum skömmum fyrir að kunna sig ekki við andlát og jarðarför Hugos Chavez

Mahmoud Ahmadinejad, forseti Írans, sætir mikilli gagnrýni af hálfu traustustu stuðningsmanna sinna eftir framgöngu sína þegar Hugo Chavez, forseti Venezúela, var borinn til grafar.

Mahmoud Ahmadinejad, forseti Írans, huggar móður Hugos Chavez á óviðurkvæmilegan hátt.

Klerkar og nánir samstarfsmenn Ahmadinejads Íransforseta telja hann hafa brotið reglur kóransins með því að taka utan um og hugga Elenu Frias, móður Chavez, við útför sonar hennar. Gagnrýni tók að heyrast á forsetann strax föstudaginn 8. mars þegar mynd af Ahmadinejad með konu í faðminum fór um heiminn.

Margir áhrifamiklir klerkar í borginni Qom, miðstöð íranska klerkaveldisins, segja í írönskum blöðum þriðjudaginn 12. mars að faðmlag á borð við þetta sé bannað að islömskum lögum og Ahmadinejad er sakaður um að gera sig að „fífli“ segir á arabísku vefsíðunni Al-Arabiya.

Samkvæmt ströngum skilningi á íslömskum reglum er líkamleg snerting milli einstaklinga af ólíku kyni ekki leyfð nema innan fjölskyldunnar.

Á þingi Írans situr hópur íhaldssamra þingmanna sem studdu Ahmadinejad í forsetakosningunum 2008. Þingmennirnir telja forsetann hafa brugðist sér með óverjanlegri framgöngu sinni.

Mohammed Dehghan þingmaður segir við Al-Arabiya – án þess að nefna Ahmadinejad á nafn – að svona hegðun þjóðþekkts landsföður sé í andstöðu við það sem almenningur telji sig mega vænta af þeim sem segist knúinn áfram og stjórnað af trúarlegri sannfæringu. Hann notar einnig tækifærið til að vara við því að þeir stuðningsmenn Mamouds Ahmadinejads, sem Ali Khamanei, andlegur leiðtogi Írans, kallar „hina siðlausu“, fái of mikil áhrif. Það eigi að kalla Ahmadinejad á skólabekk hjá hinum andlegu leiðtogum og kenna honum lexíu.

Mohammed Taghi Rahbar sem hefur verið stuðningsmaður Ahmadinejads eins og Mohammed Dehghan segir að forsetinn hafi misst stjórn á sér við jarðarförina.

Fyrir utan framgönguna í jarðarförinni sjálfri hefur það farið fyrir brjóstið á mörgum sanntrúuðum í Íran að Ahmadinejad hafi í samúðarbréfi til íbúa Venezúela lýst látnum forseta þeirra sem „píslarvotti“ sem muni rísa upp frá dauðum og snúa aftur til jarðar í fylgd með Jesú Kristi og Mahdi sem er heilagur maður, einkum í augum shíta-múslíma.

Forystumenn shíta hafa sagt opinberlega að Ahmadinejad ætti að vita nógu mikið um trúmál til að senda ekki slíkt frá sér og þeir hvetja hann til að láta hjá líða að tjá sig um trúmál þann tíma sem hann á eftir á forsetastóli, það er til ágúst 2013.

Forsetinn hafði áður sætt gagnrýni fyrir að sýna þjóðlegum degi syrgjenda óvirðingu í tengslum við andlát Chavez.