Bretar reiðir vegna krafna frá ESB um sameiginlegan kjördag og kynningu á ESB-forsetaefni

Innan Evrópusambandsins er unnið að tillögum um samræmdan kjördag í því skyni að árétta að samstarfið innan sambandsins sé reist á „pólitískri samheldni“. Bretar bregðast illa við hugmyndinni og telja að þeir verði neyddir til að hverfa frá hefð sinni að kjósa á fimmtudögum og ákveða sunnudag sem kjördag að vilja meirihluta ESB-ríkja.

Í frétt um þetta í The Daily Telegraph þriðjudaginn 12. mars segir að Bretar verði einnig að búa sig undir að stjórnmálaflokkar verði með sjónvarpskynningar þar sem fólk verði hvatt til að kjósa um næsta forseta framkvæmdastjórnar ESB.

Hér er um að ræða tillögur frá framkvæmdastjórn ESB um samræmdar reglur við kosningar til ESB-þingsins sumarið 2014. „Með sameiginlegum kjördegi og lokun kjörstaða á sama tíma yrði betur en ella dregin athygli að því að um sameiginlegar kosningar innan sambandsins er að ræða og að þær eru hluti þess fulltrúalýðræðis sem er grunnur ESB,“ segir í tillögunni.

Nigel Farage, leiðtogi flokks breskra sjálfstæðissinna, UKIP, segir: „Við erum algjörlega andvíg sameiginlegum kjördegi vegna ESB-þingsins og teljum fráleitt að efnt verði til sveitarstjórnakosninga á öðrum degi.“ Í Bretlandi er efnt til þessara kosninga á sama degi.

The Daily Telegraph segir að hefð sé fyrir því í Bretlandi og Hollandi að ganga til kosninga á fimmtudegi. Á Írlandi og í Tékklandi sé kosið á föstudegi. Í Frakklandi, Lettlandi, Slóvakíu, á Kýpur, Ítalíu og Möltu sé kosið á laugardegi. Í 17 öðrum ESB-ríkjum sé kosið á sunnudegi.

Í tillögu framkvæmdastjórnarinnar er lagt til að stjórnmálaflokkar á ESB-þinginu og flokkar í einstökum löndum kynni fyrir ESB-þingkosningarnar hvaða frambjóðanda þeir ætli að styðja sem forseta framkvæmdastjórnar ESB. Þessu verði meðal annars komið á framfæri í kynningarþáttum flokkanna fyrir kosningarnar.

Breskir íhaldsmenn hafa hafnað þessari tillögu. Þeir segja að ekki sé þörf fyrir neinn kjörinn forseta Evrópu af því að það sé ekki til neitt land sem heiti Evrópa. Það sé aðeins þörf á kjörnum þjóðhöfðingja í fullvalda ríki, Evrópusambandið sé á hinn bóginn alþjóðastofnun.

Í Lissabon-sáttmálanum segir að næsti forseti framkvæmdastjórnar ESB verði sá sem tilnefndur verði af þeim ESB-þingflokki sem fá flest atkvæði í ESB-þingkosningunum. Í því ljósi eru ESB-þingflokkar og aðildarflokkar þeirra í einstökum ESB-löndum hvattir til að kynna rækilega forsetaefni sitt vegna framkvæmdastjórnarinnar.