ESB-þingið: Shimon Peres hvetur Arababandalagið til að grípa í taumana í Sýrlandi vegna fjöldamorða þar

Shimon Peres, forseti Ísraels, flutti ræðu á ESB-þinginu í Strassborg þriðjudaginn 12. mars og lýsa fréttamenn henni sem „sögulegri“ en þar hvatti hann meðal annars Arababandalagið til íhlutunar í Sýrlandi „til að stöðva fjöldamorðin“.

Shimon Peres

„Arababandalagið getur og því ber að stofna bráðabirgðastjórn í Sýrlandi til að stöðva fjöldamorðin, til að koma í veg fyrir að Sýrland molni í sundur. Sameinuðu þjóðirnar ættu að styðja Arababandalagið við að koma á fót arabaher með bláa hjálma,“ sagði Peres í ræðu í ESB-þinginu. Hann er fyrsti þjóðhöfðingi Ísraels sem ávarpar þingið í tæpa þrjá áratugi.

Hinn frjálsi heimur sagði hann „getur ekki horft aðgerðalaus á þegar sýrlenski forsetinn fremur fjöldamorð á eigin þjóð, á eigin börnum.“

Vestrænir leiðtogar hafa nokkrum sinnum beitt sér í öryggisráði SÞ fyrir heimild til íhlutunar í Sýrlandi en Rússar og Kínverjar hafa komið í veg fyrir allar aðgerðir. Stig af stigi hafa ESB og Bandaríkin viðurkennt stjórnarandstöðuhópa í Sýrlandi. Báðir aðilar hafa staðið að vopnasölubanni af ótta við að vopnin kynnu að komast í hendur öfgamanna. Nýlega opnuðu ESB og Bandaríkin glufu til að senda mætti minniháttar vopn til stjórnarandstæðinga.

Stjórnmálaþrýstingur hefur ekki dugað til knýja Bashar al-Assad Sýrlandsforseta til að afsala sér völdum. Vestrænir ráðamenn óttast að finnist ekki pólitísk lausn á Sýrlandsstríðinu í bráð kunni landið að verða pólitískt upplausnar- og hættusvæði eins og Sómalía.

Borgarastríð hefur verið háð í tvö ár í Sýrlandi. Sameinuðu þjóðirnar telja að 70.000 manns hafi fallið og um 2 milljónir manna séu án heimilis. Um 1 milljón manna hefur flúið til nágrannaríkjanna Tyrklands, Jórdaníu og Líbanons.

Peres segir að Bashar al-Assad sé ógn við allt svæðið „og jafnvel einnig Evrópu“ og minnir á að í Sýrlandi séu efnavopn. Aðeins Arababandalagið geti komið í veg fyrir að efnavopn lendi i röngum höndum.

Í ræðu sinni nefndi Ísraelsforseti að hafa bæri sérstakt auga með Írönum og Hezbollah-hreyfingunni því að ekki mætti hafa hótanir að engu.

Peres sagði stjórn Írans vera „mestu ógn við frið í heiminum“ og minnti á hótanir stjórnarinnar í garð Ísraela og neitun íranskra ráðamanna um að hætta hreinsun úraníum sem vestrænir sérfræðingar óttast að unnt verði að nýta til að framleiða kjarnorkuvopn.

Hann sagði líbanska Hezbollah-hópinn vera hryðjuverkahóp og hvatti ESB-þingmenn til að setja þann sama stimpil á hópinn.

Um þessar mundir þrýsta Ísraelar og Bandaríkjamenn á ESB með óskum um að sambandið setji Hezbollah hópinn á lista eftir hryðjuverkamenn. „Rödd ykkar nýtur mikillar virðingar“ sagði Peres og tók undir með þeim sem kalla: „Við skorum á ykkur – kallið hryðjuverk, hryðjuverk.“

Chaim Herzog var síðasti þjóðhöfðingi Ísraels á undan Peres, sem flutti ávarp í þingi ESB. Það gerðist fyrir 28 árum þegar aðildarríki ESB voru 10.

Heimild: DW