Stækkunar­deild ESB hefur boðið 120 íslenskum sveitar­stjórnar­mönnum frá Íslandi til Brussel vegna aðlögunarferlisins

Stækkunardeild Evrópusambandins hefur í samvinnu við sendiráð ESB á Íslandi og utanríkisráðuneytið boðið 120 íslenskum sveitarstjórnarmönnum á árinu 2012 og fyrri hluta þessa árs til Brussel í því skyni að „auka getu sveitarstjórna til að laga sig að ESB-aðild og auka skilning þeirra og þekkingu á Evrópusambandinu og aðlögunarferlinu“ eins og segir á vefsíðu framkvæmdastjórnar ESB þar sem þetta kynningarstarf er, LAF-starfsemin, er kynnt.

Höfuðstöðvar svæðanefndarinnar, Committee of Regions, í Brussel.

Í skýrslu sem utanríkisráðuneytið sendi frá sér um framvindu ESB-aðildarviðræðnanna hinn 16. apríl sl. segir að um 80 íslenskir sveitarstjórnarmenn hafi tekið þátt í svonefndum LAF-viðburðum (Local Administration Facility) í Brussel á árinu 2012. Í skýrslunni segir að LAF-viðburðir séu umræðu- og samskiptavettvangur sveitarstjórnarstigsins. Starfið miði einkum að því „að gefa sveitarstjórnarfólki innsýn í starfsemi stofnana ESB.

Á vefsíðu sendiráðs ESB á Íslandi er fjallað um LAF-viðburðunum lýst á þennan hátt:

“LAF stendur fyrir Local Administration Facility. Sveitastjórnarstigið gegnir lykilhlutverki í samstarfi Evrópuþjóða og eitt aðal markmið LAF er að auka þekkingu og skilning fulltrúa sveitastjórnarstigsins á starfsemi og ákvarðanatöku innan ESB. LAF sér um að skipuleggja og greiða fyrir viðburði fyrir fulltrúa sveitastjórna, bæði kjörinna fulltrúa og embættismanna, sem annað hvort eru haldnir í Brussel eða í heimalandi þeirra sem viðburðina sækja. Á viðburðunum er fjallað um tengsl Evrópusambandsins við sveitastjórnarstigið, bæði almennt og á sértækari sviðum. Fari fulltrúarnir til Brussel skoða þeir stofnanir Evrópusambandsins og hitta forystufólk sveitastjórna- og svæðayfirvalda í ESB. Öll umsóknarríki og möguleg umsóknarríki ESB, þar með talið Ísland, geta nýtt sér LAF.

Svæðanefndin (en. Committee of Regions), stjórnarsvið stækkunarmála hjá framkvæmdastjórn ESB og sendinefnd ESB á Íslandi sjá um að skipuleggja LAF viðburði. Þátttakendur eru valdir af sendinefndinni í samstarfi við skrifstofu landstengiliðs IPA á Íslandi og Samtök íslenskra sveitarfélaga.

40 manns fóru til Brussel í júní 2012 og annar eins fjöldi í sambærilega ferð í desember sama ár. Þá er búið er að skipuleggja LAF viðburð í Brussel dagana 20.-22. mars 2013 fyrir 40 fulltrúa íslenskra sveitarfélaga auk þess sem stefnt er á að halda annan viðburð á vegum LAF dagana 17.-19. apríl þar sem umfjöllunarefnið mun fyrst og fremst snúast um velferð og fötlun.„

Á vefsíðu framkvæmdastjórnar ESB segir að tilgangurinn með LAF sé að auka getu sveitarstjórna til að laga sig að ESB-aðild og auka skilning þeirra og þekkingu á Evrópusambandinu og aðlögunarferlinu.

Í öðru lagi skuli unnið að því að skiptast á reynslu og starfsaðferðum í því skyni að auka þekkingu og hæfni sveitarstjórna að því er varðar samrunaþróunina í Evrópu og aðlögun að henni.

Í þriðja lagi skuli miðlað þekkingu um starfsemi ESB-stofnana og hlutverk sveitarstjórna í aðlögunar- og aðildarferlinu og við innleiðingu laga ESB.