Bretland: Þingmenn Íhalds­flokks vilja flýta þjóðar­atkvæða­greiðslu um ESB-fram til maí 2014

Telja það nauðsynlegt til að stöðva framgang Ukip

Hópur þingmanna brezka Íhaldsflokksins vill flýta þjóðaratkvæðagreiðslu í Bretlandi um afstöðu Breta til Evrópusambandsins og efna til hennar ekki síðar en í maí á næsta ári. David Cameron hefur stefnt að því að slík atkvæðagreiðsla fari fram á árinu 2017 en þingmennirnir telja að það verði of seint til þess að stöðva framgang Ukip (United Kingdom Independence Party).

Sunday Telegraph segir að um sé að ræða ýmsa helztu áhrifamenn í þinginu og samtals um 20 þingmenn. Þar á meðal eru John Redwood, sem einu sinni kom til greina sem leiðtogi flokksins, Bernard Jenkin og David Davis, sem hefur líka boðið sig fram til forystu flokksins. Hugmyndir Cameron hafa verið þær að endursemja um stöðu Bretlands innan ESB og leggja slíkan samning undir þjóðaratkvæði að fjórum árum liðnum.

William Hague, utanríkisráðherra, viðurkennir í grein í Sunday Telegraph í dag að úrslit sveitarstjórnarkosninganna á fimmtudag hafi verið skýr skilaboð til ríkisstjórnarinnar eins og hann orðar það. Hins vegar tekur hann ekki undir kröfur um að flýta þjóðaratkvæðagreiðslu. Áhyggjur þingmanna Íhaldsflokksins beinast að því að Ukip verði til þess að þeir missi þingsæti sín.

Heimildarmenn Sunday Telegraph í Downingstræti segja, að frjálslyndi flokkurinn, samstarfsflokkur Íhaldsmanna, muni nær örugglega beita neitunarvaldi gegn þjóðaratkvæðagreiðslu um ESB, sem fram færi fyrir þingkosningar 2015. Hins vegar er bent á að þingmenn gætu lagt fram tillögu í brezka þinginu um að flýta fyrirhugaðri atkvæðagreiðslu. Að vísu gætu þingmenn Frjálslyndra greitt atkvæði gegn slíkri tillögu en þeir mundu þá líta út í augum kjósenda, sem „ólýðræðislegir“.

John Redwood segir að halda verði þjóðaratkvæðagreiðslu vegna þess að almenningur sé búinn að fá nóg af því að geta ekki sent fólk úr landi, þegar Bretar vilji, að Bretar geti ekki haft stjórn á fjölda innflytjenda sem koma til Bretland frá Evrópu, að Bretar geti ekki ákveðið eigið tryggingakerfi og að þeir verði að borga hærra orkuverð en ella vegna aðildar að ESB og vegna þess að Bretar geti ekki stoppað flóð regluverks frá ESB.

Þingmennirnir segja líka að ákvörðun um þjóðaratkvæðagreiðslu á næsta ári mundi styrkja samningsstöðu Bretlands gagnvart Evrópusambandinu.

Nýjar tölur sýna, að kostnaður Breta vegna aðildar umfram það sem þeir fá frá Brussel nemi 32 milljörðum punda. Skýrsla frá hugveitunni Civitas færir rök að því að viðskiptalífið í Bretlandi mundi hagnast mjög á því að standa utan ESB. Bretar leggja fram 5,6 milljónir punda til sameiginlegrar landbúnaðarstefnu ESB, 6,8 milljarða til fjárlaga ESB og kostnaður brezkra fyrirtækja vegna regluverks og löggjafar frá Brussel er talinn vera um 19 milljarðar punda á ári.