Írland: 308.000 flust á brott - rúmlega helmingur ungs fólks íhugar brottflutning

Alls hafa 308.000 Írar leitað til útlanda eftir vinnu á undanförnum fjórum árum og helmingur ungs fólks undir 24 ára aldri hefur velt fyrir sér að flytja úr landi. Frá þessu segir í blaðinu The Irish Independent föstudaginn 10. maí og þar er einnig vísað til nýrrar skýrslu sem segir að margir brottfluttir vilji snúa heim að nýju en líklegt sé að þeir fái „öfugt menningaráfall“ við heimkomuna og fóti sig ekki.

Marie Claire McAleer við National Youth Council of Ireland (NYCI), æskulýðsráð Írlands, hefur í fyrsta sinn kannað hið mikla tilfinningaálag sem leggst á þúsundir írskra fjölskyldna vegna brottflutnings í leit að störfum.

„Afleiðing þess að tapa svo miklum fjölda af ungu fólki okkar mun koma í ljós,“ segir í skýrslunni. „Ekki er neinn vafi á að áhrifin af brottflutningi menntaðs fólks og af því að tapa verulegum hluta af unga fólkinu leiða til þess að skarð verður þegar leitað er eftir þjálfuðu, vel menntuðu vinnuafli og einnig myndast skarð í heila kynslóð Íra.“

Í skýrslunni er ríkisstjórnin hvött til að leggja þeim meira lið sem ella huga á brottflutning og að sérstökum ráðherra verði falið að fjalla um brottflutning.

Í skýrslunni er vísað til rannsókna sem reistar eru á viðtölum við rúmlega 1.000 unga Íra sem flutt hafa til Kanada og Bretlands á síðustu tveimur árum.

Í könnuninni kemur einnig fram að rúmlega 50% á aldrinum 18 til 24 ára hafa íhugað að flytja á brott og um 40% á aldrinum 25 til 40 ára.

Af þeim 308.000 sem hafa yfirgefið Írland undandarin fjögur ár eru 41% á aldrinum 15 til 24 ára.

Um 7% þeirra sem eru eldri en 65 ára hafa einnig velt fyrir sér að flytja til annars lands, þeirra á meðal eru afar og ömmur sem vilja ekki slíta tengsl við unga afkomendur sína.