Bretland: Uppnám í þing­flokki Íhaldsmanna vegna stefnuræðu drottningar

Flytja tillögu þar sem harmað er að ekki var fjallað um þjóðar­atkvæða­greiðslu í ræðunni

Uppnám er í þingflokki brezka Íhaldsflokksins vegna þess, að í stefnuræðu drottningar á þingi fyrir skömmu var ekki getið um ráðstafanir til þess að greiða fyrir þjóðaratkvæðagreiðslu um afstöðu Breta til Evrópusambandsins. Af þeim sökum er hópur þingmanna að undirbúa tillögu þar sem þetta verður harmað (express regret). Downingstræti 10 hvetur ráðherra til þess að sitja hjá við atkvæðagreiðsluna, sem Sunday Telegraph segir að engin fordæmi séu fyrir þar sem í því felist að ráðherra greiði ekki atkvæði með stefnuræðu drottningar. Í þeirri ræðu er gerð grein fyrir þeim löggjafartillögum, sem ríkisstjórnin muni leggja fram á næsta þingi.

Blaðið segir að afstaða ráðherra og aðstoðarráðherra verði metin sem spurning um stuðning við ríkisstjórnina. Það yrði vandræðalegt fyrir Cameron ef einhver úr þeim hópi greiddi atkvæði með slíkri tillögu. Ónafngreindur ráðherra sagði við Sunday Telegraph að málið sýndi pólitíska veikleika Camerons. Hann gæti ekki krafizt þess af ráðherrum sínum að þeir greiddu atkvæði gegn tillögunni, þar sem sumir þeirra mundu þá ganga út.

Forsyth, lávarður, sem var náinn samstarfsmaður Thatcher og áhrifamaður á hægri væng Íhaldsflokksins hefur nú gengið í lið með Nigel Lawson og Michael Portillo, sem vilja brottför Bretlands úr ESB. Hins vegar skrifar annar áhrifamaður í flokknum Michael Heseltine, sem nú er áttræður að aldri, grein í Financial Times, þar sem hann hvetur Bretland til þess að halda áfram innan Evrópusambandsins. Heseltine hefur lengi verið sterkur stuðningsmaður aðildar Bretlands að ESB.