Seðlabanka­stjóri Frakka varar við fjármagnsfærsluskatti - segir niðurskurð bíða frönsku ríkis­stjórnar­innar

Christian Noyer, seðlabankastjóri Frakklands, segir að fyrirhugaður ESB-skattur á fjármagnsfærslur geti „skaðað“ efnahagslífið sé hann ekki lögfestur og innheimtur á réttan hátt. Fyrr á þessu ári voru Frakkar í hópi 11 þjóða innan ESB sem ákváðu að taka sjálfar frumkvæði að þessari skattheimtu (svonefndum Tobin-skatti).

Christian Noyer

Sir Mervyn King, seðlabankastjóri Bretlands, hefur eindregið varað við skatti af þessu tagi og hann sagði fyrr í þessum mánuði að hugmyndin um hann nyti ekki einu sinni heilshugar stuðnings ráðamanna hinna 11 ríkja sem segist vilja sjá hana í framkvæmd. Hann sagð að „miklar efasemdir“ settu svip sinn á afstöðu stjórnmálamanna í þeim ríkjum sem hefðu lýst áhuga á að lögfesta skattinn. Hann sagðist ekki finna neinn meðal stjórnenda seðlabanka sem teldi þetta góða hugmynd.

Í The Daily Telegraph segir þriðjudaginn 28. maí að ummæli Noyers staðfesti skoðun Sir Mervyns. Noyer sem situr í stjórn Seðlabanka Evrópu hefur sagt:

„Það skiptir höfuðmáli að skilgreina grunninn, hlutfallið og umfang hugsanlegs skatts á fjármagnsfærslur til að forðast hættuna á að eyðileggja ákveðinn hluta fjármálaþjónustu okkar eða flytja störf til útlanda og koma í veg fyrir mjög eyðileggjandi áhrif á lántökur ríkisins og fjármögnun efnahagslífsins.“

Núverandi hugmyndir gera ráð fyrir að 0,1% gjald verði lagt á færslur á höfuðstól og skuldum og 0,01% á afleiður. Þjóðverjar, Frakkar, Ítalir og Spánverjar eru í hópi þeirra sem hafa samþykkt þessa skattheimtu. Framkvæmdastjórn ESB telur að hún skili 35 milljarða evru tekjum á ári og vill að hún komi til sögunnar á árinu 2014.

Í tillögunum er kynnt fyrirkomulag sem reist er á ákvæði um „útþenslu yfirráðasvæðis“ til að sporna gegn því að skatturinn flæmi fyrirtæki úr landi. Skatturinn yrði lagður á allar tilfærslur í evrum jafnvel í löndum sem ekki eru aðilar að skattheimtunni. Bretar ætla að láta á gildi þessa ákvæðis reyna fyrir evrópskum dómstólum, Bandaríkjamenn og aðrar þjóðir hafa lýst yfir að þær muni ekki sætta sig við ákvæðið. Talið er að þar með verði fjármagnsfærsluskatturinn markleysa.

Sir Mervyn hefur gefið til kynna að ESB muni grípa til þess ráðs að slá skattahugmyndina út af vellinum til að tefja fyrir innleiðingu hennar. Wolfgang Schäuble, fjármálaráðherra Þýskalands, ýtti undir vangaveltur um þetta fyrr í þessum mánuði þegar hann gerði lítið úr gildi skattsins. „Við höfum aðeins lítillega rætt málið. Þetta er ekki efst á listanum í hreinskilni sagt,“ sagði Schäuble. „Á þessu ári, næsta ári … það er ekki mikið vandamál.“

Ummæli Noyers féllu þegar hann ræddi almennt um hættuna sem steðjar að efnahag Frakklands, þar ríkir nú efnahagslægð annað árið í röð. Talið er að í ár verði 0,1% samdráttur eftir engan hagvöxt 2012.

Seðlabankastjórinn sagði að François Hollande forseti og ríkisstjórn sósíalista yrði nú að skera niður útgjöld og líta þá til óvinsælla aðgerða eins og lækka eftirlaun og útgjöld til félagsmála auk þess að fækka opinberum starfsmönnum og lækka laun þeirra. Hann sagði:

„Félagsleg útgjöld eru um 30% af landsframleiðslu og ekki er unnt að halda áfram á þeirri braut.

Í upphafi beindist athygli að hækkun skatta og félagslegra framlaga í því skyni að ná skjótum árangri. Nú verður ríkisstjórnin hins vegar að beina athygli sinni að ríkisútgjöldum til að ná markmiði sínu, skattheimtan er orðin mjög mikil og nýjar álögur á atvinnuveitendur munu aðeins draga enn frekar úr umsvifum þeirra og fækka störfum.“