Viðskiptastríð magnast milli ESB og Kína - gjöld á sólarorkubúnað frá Kína leiða til athugana á innfluttum ESB-vínum

Viðskiptastríð er hafið milli Kína og ESB eftir að framkvæmdastjórn sambandsins ákvað að leggja ofurhá innflutningsgjöld á sólarraforkubúnað frá Kína. Svar Kínverja var að hefja athugun á innflutningi á víni frá ESB-ríkjum. Snertir vínútflutningur til Kína persónulega hagsmuni viðskiptastjóra ESB sem ákvað gjöldin á kínversku tækin.

Viðskiptaráðuneyti Kína sagði miðvikudaginn 5. júní að hafin yrði rannsókn á viðskiptaháttum með vín frá ESB-ríkjum vegna grunsemda um að þar væri um undirboð að ræða og ríkisstyrkir væru notaðir til að ákvarða verðlag. Segir í fréttum að kínverskir vínframleiðendur hafi óskað eftir athugun stjórnvalda á viðskiptaháttum innflytjenda frá ESB-ríkjum.

Þessar aðgerðir Kínverja bitna harðast á Frökkum sem hafa eindregið stutt hækkun gjalda á sólarraforkubúnaðinn frá Kína, Þjóðverjar og Bretar lögðust gegn aðgerðum gegn Kínverjum á þessu sviði.

„Ráðuneytið hefur þegar tekið á móti beiðni frá vínframleiðendum á heimamarkaði, þeir segja að beitt sé óeðlilegum aðferðum eins og undirboðum og styrkjum til að ákvarða verð á víni frá Evrópu sem selt er í Kína,“ segir í opinberri tilkynningu í Peking. „Við sjáum að innflutningur á víni frá ESB hefur aukist hratt undanfarin ár og við munum haga rannsókninni í samræmi við lög.“

Um 71% af innfluttu víni í Kína kemur frá Frakklandi og selja Frakkar vín til Kína fyrir 546 milljónir evra á ári.

Í The Daily Telegraph er vakin athygli að Karel de Gucht, viðskiptastjóri ESB, sem ræður mestu um álagningu refsitollanna á Kínverja er sjálfur vínframleiðandi. Hann á víngarð í Toskana sem gefur af sér vínið La Macinaia, Chianti Classico vín sem selt er á 22,48 evrur í Belgíu.

Ítalir og Spánverjar sem studdu álagningu sólartækjagjaldanna á Kínverja flytja annars vegar út vín fyrir 77 milljónir evra og hins vegar 89 milljónir á ári til Kína. Aðgerðir Kínverja gegn víninnflutningi kunna því einnig að bitna á þeim.

Það ýtir undir grunsemdir um að aðgerðum Kínverja sé einkum beint gegn Frökkum að ákveðið hefur verið í Peking að rannsóknin á verðmyndun innflutts víns nái ekki til Hon Kong. Er þetta skýrt á þann hátt að Bretar eru stærstu útflytjendur að víni þangað fyrir 213 milljónir evra á ári.

Franska viðskiptaráðuneytið hefur andmælt viðbrögðum Kínverja og varað þá við meiri hörku í viðskiptastríðinu fari þeir ekki að reglum Alþjóðaviðskiptastofnunarinnar (WTO).

„Við lítum þetta mjög alvarlegum augum,“ sagði embættismaður ráðuneytisins í París. „Okkur sýnist af kynningu á málinu að framgangan sé ekki við hæfi og ámælisverð, það er að málið er ekki skoðað hlutlægt heldur vegna þess sem gerist á öðrum vettvangi.“

Af hálfu framkvæmdastjórnar ESB hafa menn sagt að þeim sé ljóst að Kínverjir ætli að hefja rannsókn og ESB-menn muni „fylgjast náið“ með henni. „Við teljum að ESB-ríki stundi ekki undirboð í vínsölu til Kína,“ sagði talsmaður ESB.

Þá hafa embættismenn ESB sagt að hækkun á evrópskum vínum í Kína vegna opinberrar gjaldtöku muni draga úr lífsgæðum hinna allra ríkustu og voldugustu í Kína. „Kínverska elítan verður fyrst fyrir barðinu verði sérstök gjöld lögð á gæðavín frá Frakklandi,“ sagði embættismaður í Brussel.

Kínverjar saka framkvæmdastjórn ESB um að leggja „ósanngjörn“ gjöld á sólartæki frá Kína eftir að Brusselmenn sökuðu Kínverja um að selja tækin undir raunvirði. Ný innflutningsgjöld ESB munu hækka sólarraforkutæki frá Kína um allt að 48%.

Heimild: The Daily Telegraph