Kýpur: Áform um að bjarga efnahagnum með fjárhættuspili

Kýpverjar ætla að blása nýju lífi í efnahagskerfi sitt, með aðstoð rússneskra auðmanna. Þótt ásakanir hafi verið uppi, einkum í Þýskalandi, um að Kýpur sé griðastaður fyrir peningaþvætti Rússa leita kýpversk stjórnvöld til Rússlands í leit að fjárfestum í nýrri atvinnustarfsemi, rekstri kasínóa, spilavíta.

Ríkisstjórn Kýpur hefur undirbúið frumvarp til laga um leyfi til að reka kasínó á eyjunni. Markmiðið er að fjölga ferðamönnum til eyjarinnar, skjóta nýjum stoðum undir atvinnulífið og vinna gegn fátækt vegna atvinnuleysis.

„Við viljum laða að okkur fjárfesta til að reisa kasínó-ferðamannastað sem á að stuðla að því að Kýpur hafi aðdráttarafl fyrir ferðamenn allan ársins hring,“ segir George Lakkotrypis, viðskipta-, iðnaðar- og ferðamálaráðherra, við Bloomberg fréttastöðina.

Ferðmannaþjónusta er 19% af landsframleiðslu á Kýpur og markaður fyrir fjárhættuspil mikill þar sem það hefur verið bannað í Rússlandi síðan 2009. Bannið hefur meðal annars leitt til þess að rússneskir fjárhættuspilarar hafa streymt til Hvíta-Rússlands þar sem kasínó eru starfrækt. Kýpverjar vona að hin nýja starfsemi hjá þeim hafi aðdráttarafl fyrir Rússa og aðra sem hafa þörf fyrir að spila póker, rúllettu eða blackjack.

Sérfræðingar telja að Kýpverjar kunni að detta í lukkupottinn nái markmið þeirra fram að ganga.

„Rekstrargrundvöllur fyrir kasínó á Kýpur ætti að vera frábær. Kýpur er í næsta nágrenni Mið-Austurlanda en þaðan fara margir vel stæðir einstaklingar til London til að stunda fjárhættuspil. Besta markhópinn er hins vegar að finna meðal auðugra Rússa,“ segir Warwick Bartlett, forstjóri í ráðgjafafyrirtækinu Global Betting and Gambling Consultants.

Paul Herzfeld, fyrrverandi forstjóri hjá Herzfeld Consulting er sömu skoðunar: „Kýpur getur þjónað Rússum eins og Mallorka Þjóðverjum.“

Rekstur kasínóa á Kýpur er ekki ný hugmynd. Hinir grísku mælandi íbúar eyjarinnar eru í þessu efni eftirbátar hinna tyrknesku mælandi sem búa að norðurhluta eyjunnar sem lýtur stjórn Tyrkja síðan 1974. Frá því snemma á níunda áratugnum hafa Tyrkir rekið kasínó á sínum hluta eyjunnar og laðað að sér spilaglaða ferðamenn frá Rússlandi, Ísrael og Mið-Austurlöndum.