Grikkland: Alexis Tsipras kastar þýskum blaðamanni á dyr

Leiðtogi grísku stjórnarandstöðunnar Alexis Tsipras, formaður Syriza, bandalags grískra vinstrisinna, sleit samtali við blaðamann þýska blaðsins Frankfurter Allgemeine Zeitung (FAZ) þegar hann spurði um and-þýsk ummæli Tsipras. Hann vísaði blaðamanninum á dyr fyrir brot á siðareglum með ummælum sínum, ritstjórn FAZ vísar ásökuninni á bug.

Alexis Tsipras

Samtalinu lauk eftir fimmtu spurningu blaðamanns FAZ, Michaels Martens, sem þá hafði rætt við Alexis Tsipras í sjö mínútur og 50 sekúndur. Blaðamaðurinn spurði hvað Tsipras hefði meint þegar hann sagði í júní 2012 að stjórnarflokkarnir, Nýtt lýðræði og PASOK „hefðu svívirt gríska fánann og afhent hann Angelu Merkel“.

Tsipras móðgaðist við spurninguna. Hann hefði „aldrei“ sagt þetta. Þýska blaðið segir hins vegar að til sé sönnun á þessum orðum hans. Benti blaðið á myndbandsbút frá gríska sjónvarpinu frá fundi Syriza 14. júní 2012 í Aþenu og fréttatilkynningu frá Syriza.

Tsipras og Syriza leggjast gegn aðhaldsstefnunni sem samaðilar Gríkkja að evru-samstarfinu hafa knúið þá til að fylgja til að njóta neyðarlána í evru-kreppunni. Alið hefur verið á hatri í garð Angelu Merkel Þýskalandskanslara í Grikklandi og margir telja hana bera ábyrgð á þrengingum þjóðarinnar og niðurskurði.

FAZ hefur gagnrýnt Tsipras í leiðurum og hvatt til framhalds á aðhaldsaðgerðum í Grikklandi. Í leiðara í maí 2012 var því meðal annars hreyft að brotthvarf Gríkkja úr evru-samstarfinu kynni að „stuðla að aga meðal annarra þjóða“.

Í Avgi, flokksblaði Syriza hafa birst teiknimyndir sem sýna Merkel taka við fyrirmælum frá Adolf Hitler. Þá var Wolfgang Schäuble, fjármálaráðherra Þýskalands, nýlega lýst sem „Gauleitir“ sem er heiti á héraðsforingja innan nasistaflokksins. Þjóðverjar hafa reiðst þessum tilvísunum til nasista í griskum fjölmiðum og mótmælaaðgerðum þar sem Merkel er sýnd í einkennisbúningi nasista.

Eftir að viðtalinu við blaðamann FAZ var slitið sendi blaðafulltrúi Tsipras tölvubréf til eins af helstu ritstjórum FAZ og sakaði Martens um að hafa farið „langt út fyrir siðareglur blaðamanna“ og reisa samtal á „orðrómi, yfirlýsingum þriðja aðila og upplýsingum sem ekki hafa verið sannreyndar“.

Tsipras hefði ákveðið að slíta samtalinu af því að hann tæki ekki þátt í viðtölum við „æsingablöð“ segir í tölvubréfinu. Síðar birtist grein í Agvi um Marten, blaðamann FAZ, þar sem sagði:

„Martens virðist hafa smitast af landstjóra-viðhorfinu sem samlandar hans, stjórnmálamenn og embættismenn þríeykisins tileinka sér þegar þeir spígspora um skrifstofur grískra stjórnvalda (…) Hann hélt þess vegna að leiðtogi stjórnarandstöðunnar væri almennt fús til að taka þátt í samtali sem væri pólitískt ábyrgðarlaust.“

FAZ svaraði með því að birta endurskrift viðtalsins og spyrja:

„Segi Alexis Tsipras og félagar hans að blaðamaður brjóti siðareglur með því að bera eigin yfirlýsingar undir þá – lýsir það ekki í raun betur þeim sjálfum og eðli pólitískrar framgöngu þeirra en þeim sem vitna til þeirra?“