Deutsche Bank tapar verulega á milli ára

Stjórnendur Deutsche Bank skýrðu þriðjudaginn 30. júlí frá verulegu tekjutapi bankans á öðrum ársfjórðungi 2013, hluthöfum hans til lítillar gleði. Sagt er að tapið megi að nokkru rekja til fjármuna sem lagðir hafa verið til hliðar vegna málaferla.

Hagnaður Deutsche Bank minnkaði um tæp 50% á öðrum ársfjórðungi, tekjur lækkuðu í 335 milljón evrur miðað við 666 milljón evrur á síðasta ári. Kostnaður bankans af málarekstri er mikill. Bankinn svarar til saka vegna bandarískra veðskuldabréfa og fyrir að taka þátt í samráði banka um breytingar á vöxtum.

Í yfirlýsingu bankans segir að hann hafi lagt 630 milljónir evra til hliðar í því skyni að standa undir kostnaði vegna málaferla en alls hefur bankinn orðið af 3 milljörðum evra vegna mála sem hann hefur tapað fyrir dómstólum eða samið um til að komast hjá málsókn.

Jürgen Fitschen og Anshu Jain, forstjórar bankans, sögðu að skattar á bankann reyndust nú hafa hækkað í 58% úr 31% fyrir ári sem einnig minnkaði tekjuafganginn.

Hagnaður fyrir skatta er nú 792 milljónir evra, 18% lækkun á milli ára og einnig langt fyrir neðan spár greinenda. Fitschen og Jain sögðust þrátt fyrir allt vera ánægðir með niðurstöðuna í ljósi þeirra fjárhagsbagga sem hefðu blasað við bankanum.

Þeir fullyrtu að bankinn hefði gripið til árangursríkra aðgerða til að styrkja fjárhagslega stöðu sína í samræmi við nýjar reglur og viðleitni til að minnka kostnað.