Frétt á Bloomberg um að Huang Nubo vænti mikils af nýrri ríkis­stjórn á Íslandi

Á Bloomberg-fréttavefnum birtist fimmtudaginn 13. ágúst frétt eftir Ómar R. Valdimarsson, fréttaritara á Íslandi, um að Huang Nubo, kínverski milljarðamæringurinn, sé tilbúinn til að fjárfesta á Íslandi þegar tilkynnt sé um að ný ríkisstjórn ætli að endurskoða lög um fjárfestingar sem hafi komið í veg fyrir fyrri áform hans. Fyrirsögn Bloomberg fréttarinnar er: Chinese Billionaire Huang Readies Iceland Bid on Power Shift - það er að Huang láti að sér kveða að nýju eftir valdaskipti á Íslandi.

„Ef við fáum jákvætt svar frá ríkisstjórninni getum við hafið undirbúningsvinnu,“ segir Halldór Jóhannsson, talsmaður Huangs á Íslandi, í símtali við Ómar R. Valdimarsson. „Við erum að bíða eftir viðbrögðum frá stjórnvöldum.“

Í fréttinni er minnt á að samsteypustjórn Sjálfstæðisflokks og Framsóknarflokks hafi unnið þingkosningar í apríl og hún hafi tilkynnt að hún ætlaði að rýmka reglur um eignarhald útlendinga á landi sem hafi staðið í vegi fyrir Huang til þessa. Milljarðamæringurinn hafi ætlað að festa 200 milljónir dollara til að kaupa og þróa fjallagarð á vegum fyrirtækis síns, Beijing Zhongkun Investment Group Co. Frá þessum 300 ferkílómetrum lands ætlaði hann síðan festa fé víðar á Norðurlöndum að hans sögn árið 2011.

Fréttaritari Bloomberg vitnar í símtal við Gísla Frey Valdórsson, talsmann Hönnu Birnu Kristjánsdóttur innanríkisráðherra, sem hafi sagt að ráðherrann hafi hitt „fulltrúa Huangs Nubos og skýrt fyrir þeim að þörf sé á að endurskoða löggjöfina um beina erlenda fjárfestingu í heild. Ekki í ljósi þessa eina máls; þessi endurskoðun verði gerð á næsta vetri.“

Í fréttinni á Bloomberg segir að til að fara í kringum reglur um eignarhald útlendinga á landi hafi fulltrúar sveitarstjórna reynt að kaupa landið og leigja til Huangs. Sú aðferð hafi einnig mætt andstöðu af hálfu fyrri ríkisstjórnar undir forystu jafnaðarmanna. Milljarðamæringurinn geri sér nú vonir um að nýja ríkisstjórnin samþykki leigusamnings-lausnina að sögn Halldórs Jóhannssonar.

Í fréttinni segir að Huang eigi eignir í Kaliforníu og Tennessee og hann sé kunnur fyrir að hafa lagt lið við endurreisn 200 ára gamalla þorpa, Xidi og Hongcun, við Huangshan-fjall í Anhui-héraði í Austur-Kína en þorpin séu nú á heimsminjaskrá UNESCO. Komi fram á vefsíðu Beijing Zhongkun að fyrirtækið reki ferðamannaþjónustu í nágrenni við þorpin.

Minnt er á að Sigmundur Davíð Gunnlaugsson forsætisráðherra hafi sagt að 14 milljarða dollara hagkerfi í Íslands þarfnist meiri fjárfestingar til að ýta undir vöxt. Þjóðin sé enn að ná sér eftir fjármálahrunið 2008 þar sem stærstu bankar hennar hafi orðið gjaldþrota vegna 85 milljarða dollara skulda. Við þetta hafi krónan lent í frjálsu falli og ríkisstjórnin hafi orðið að óska eftir neyðarláni og setja á gjaldeyrishöft.

Landið sem Huang vilji leigja á Norður-Íslandi sé að þremur fjórðu í eigu sex einstaklinga en ríkið eigi hinn hluta þess. Upphaflegu tilboði Huangs árið 2011 hafi að sögn ríkisútvarpsins verið hafnað eigendum 2,8% landsins.

„Það kann að taka tvö ár að deiliskipuleggja landið,“ segir Halldór Jóhannsson. „Ég er einnig sannfærður um að önnur verkefni sem hafa verið rædd og kynnt sem hugsanleg verkefni munu komast á rekspöl um leið og þessu verkefni er hleypt af stokkunum.“

Rétt er að geta þess í viðbót við ofangreinda frétt á Bloomberg-vefsíðunni að Hanna Birna Kristjánsdóttir innanríkisráðherra hefur sagt að fyrir sér vaki ekki að breyta neinu í íslenskum lögum sem bæti réttarstöðu Huangs Nubos frá því sem nú er.