Danska þingið: Ekki nóg að gert til að tryggja leit og björgun við Grænland - krafist viðbragða varnarmála­ráðuneytisins

Skoðunarmenn danska ríkisreikningsins (þingmenn) hafa áhyggjur af að danska ríkið hafi ekki í öllum tilvikum gert nægar ráðstafanir til að bregðast við nýjum hættum sem steðja að fólki og umhverfi vegna aukinna siglinga í lögsögu Grænlands.

Danska eftirlitsskipið Knud Rasmussen er sérhannað til siglinga við Grænland.

Þetta kemur fram í álitsgerð skoðunarmannanna sem var birt miðvikudaginn 11. september þar sem fjallað er um verkefni Dana varðandi leit, björgun, öryggi skipa og ummhverfisvernd á yfirráðasvæði danska ríkjasambandsins á norðurslóðum – Færeyjum og Grænlandi.

Í skýrslunni er minnt á að erfitt veðurfar á norðurslóðum geri sérstakar kröfur til þeirra sem þar starfa og siglingar hafi aukist á þessum slóðum undanfarin ár vegna minni íss. Fjölgun skemmtiferðaskipa og skipaferða vegna olíuleitar, hafrannsókna auk annarra viðfangsefna auki hættu á slysum og mengun frá skipum, til dæmis með olíulosun.

Skoðunarmennirnir telja nauðsynlegt að auka samhæfingu og ákvarða skil verkefna og ábyrgðar á milli dómsmálaráðuneytisins og varnarmálaráðuneytisins að því er varðar leit og björgun. Þeir telja að framlag dönsku herstjórnarinnar við eftirlit á hafinu og með mengun í sjó við Grænland hafi verið of lítið. Eftirlit með ferðum skipa með mengandi efni sé ekki nægilegt. Herstjórnin hafi ekki lagt mat á hættuna af mengun í norðurhöfum og hún hafi ekki séð til þess að mennta fólk til að sinna verkefnum á þessum sviðum.

Lagt er til við varnarmálaráðuneytið að gerðar verði ráðstafanir til að auka forvarnarstarf á þessu sviði. Þá verði þess gætt að sá tækjabúnaður sem er til í Danmörku til að takast á við leit, björgun og mengun í sjó dugi til að nota á heimskautasvæðum.

Varnarmálaráðherrann hefur fjóra mánuði til að bregðast við ábendingum skoðunarmannanna en hann hefur þegar sagt við fjölmiðla að unnið sé að endurbótum á þeim sviðum sem nefnd eru í skýrslu þeirra.

Danska forsætisráðuneytið hefur komið á fót starfshópi til að vinna að frekari afmörkun verkefna milli lögreglunnar á Grænlandi og danska hersins við leit og björgun. Þar er bæði hugað að landfræðilegri ábyrgð og einnig ábyrgð eftir því hvers eðlis atvik eru hverju sinni..

Í skýrslu sem varnarmálaráðuneytið gaf út í janúar 2013 segir að ekki sé unnt að nýta tækjabúnað vegna leitar og björgunar sem er í Danmörku við aðgerðir í nágrenni Grænlands, það taki of langan tíma að flytja hann á vettvang auk þess sem hann sé ekki ætlaður til nota við heimskautaaðstæður. Varnarmálaráðuneytið hefur ekki tekið ákvörðun um hvernig brugðist skuli við þessum vanda.