Hátæknikerfi Frontex er ætlað að loka Miðjarðahafi fyrir flóttamönnum

Evrópusambandið stefnir að því að koma á fót hátækni-eftirlitskerfi á Miðjarðarhafi eftir sjóslysið mikla við Lampedusa fimmtudaginn 3. október. Á vefsíðunni SpiegelOnline segir föstudaginn 11. október að ætlunin sé að nota dróna, njósnabúnað, þar á meðal á baujum úti fyrir ströndum landa, auk gervitungla til að fylgjast með ferðum á hafinu. Öllum upplýsingum verði beint í eina miðstöð og auk þess upplýsingum frá einstökum ríkjum. Þetta verði allt gert undir stjórn Frontex, landamærastofnunar Evrópu.

Kerfið er kallað Eurosur og er ætlunin að það verði tekið í notkun í desember. Markmiðið er að fækka ólöglegum ferðum yfir landamærin inn í Evrópu, en um tveir þriðju þeirra sem laumast yfir landamærin inn í ESB koma sjóleiðis.

Á SpiegelOnline segir að hvað sem líði ummælum evrópskra stjórnmála um skilning á aðstöðu flóttamannas sé björgun þeirra ekki yfirlýst verkefni Eurosur. Það verði hins vegar tæki sem aðildarríkin geti notað „til að bæta stöðumat og viðbragðsafl þegar unnið er að því að leita að og koma í veg óreglulega komu fólks og glæpastarfsemi yfir landamæri auk þess að vernda og bjarga innflytjendum við ytri landamærin…“ Hvergi sé nefnt hvernig staðið skuli að björgunarstörfunum.

Áætlun gerir ráð fyrir að það kosti 244 milljónir evrur að koma Eurosur af stað en Spiegel vitnar í Heinrich Böll-stofnunina sem telur að kerfið muni kosta 874 milljón evrur og segir að ekki hafi farið fram neitt tæknilegt áhættumat á nýja kerfinu.

Margir hafa þó meiri áhyggjur af að upplýsingar sem aflað verði með drónum um flóttamenn berist til stjórnvalda í Alsír og Líbíu. Gert er ráð fyrir tvíhliða samningum við ríkisstjórnir þessara landa. Það kynni að gera þeim kleift að hafa hendur í hári flóttamannanna áður en þeir komast að landamærum Evrópu. Stjórnvöld í Alsír og Líbíu hafa oft sætt gagnrýni mannréttindasamtaka fyrir meðferð þeirra á flóttamönnum.