Baulað á Frakklandsforseta við minningarathöfn í París

Baulað var á François Hollande Frakklandsforseta mánudaginn 11. nóvember við hátíðlega minningarathöfn um látna hermenn á lokadegi fyrri heimsstyrjaldarinnar 1918. Mótmælendur hrópuðu „Hollande segðu af þér“ og „Einræði sósíalista“ þegar Frakklandsforseta var ekið eftir Champs-Elysées-breiðgötunni að Sigurboganum í hjarta Parísar.

Rauðhúfu-menn mótmæla á götum Parísar 11. nóvember 2013.

„Þú hefur engan rétt til að nýta þér 11. nóvember. Þú ert Frakklandi til skammar!“ hrópaði einn þeirra sem stóð við breiðgötuna. Til átaka kom milli mótmælenda og öryggisvarða, lögreglan sagði að tæplega 70 manns hefðu verið handteknir. Sumir mótmælendur voru úr hópum sem skipa sér lengst til hægri í samfélaginu auk þess var þar einnig að finna fólk sem mótmælti nýsettum lögum um hjónabönd samkynhneigðra.

Meðal þeirra sem gerðu hróp að Hollande báru nokkrir rauðar húfur. Þær eru að verða einkenni þeirra sem finnst nóg komið af skattahækkunum í Frakklandi og vaxandi atvinnuleysi. Hreyfing kennd við rauðar húfur varð til í síðasta mánuði í landbúnaðarhéruðum Bretagne-skaga þar sem fólk setti húfurnar á sig í götumótmælum gegn skattahækkunum og skírskotaði þar til „Rauðhúfu byltingarinnar“ á 18. öld.

Christian Troadec, talsmaður hreyfingarinnar á Bretagne, lýsti vanþóknun á mótmælendum í París og sagði þá ekki „hafa nein tengsl við hreyfingu okkar“.

Hollande lét mótmælin ekki fipa sig og hélt að Sigurboganum þar sem hann lagði blómsveig að gröf óþekkta hermannsins til minningar um alla sem féllu í fyrri heimsstyrjöldinni.

Heimild: The Local