Opinber ESB-rannsókn verður á miklum útflutningstekjum Þjóðverja - þeir kunna að verða beittir ESB-refsiaðgerðum

Framkvæmdastjórn Evrópu ætlar að gera nákvæma úttekt á miklum afgangi á alþjóðaviðskiptum Þjóðverja til að rannsaka hvort mikill útflutningur þeirra skaði ESB-markaði. Þjóðverjar eru sakaðir um að skapa hættulegan efnahagslegan ójöfnuð. Viðskiptajöfnuður birtist í hagtölum. Tölurnar sýna muninn á milli innflutnings og útflutnings á vörum og þjónustu. Nú hafa þessar tölur um stöðu Þýskalands orðið að ásteytingarsteini. Bandaríkjamenn saka Þjóðverja um of mikinn útflutning og að yfirfylla markaði af þýskum varningi.

José Manuel Barroso, forseti framkvæmdastjórnar ESB, tilkynnti miðvikudaginn 13. nóvember að hann mundi láta fara í saumana á viðskiptaafgangi Þjóðverja til að meta hvaða áhrif hann hefði á efnahagsstarfsemi ESB-ríkjanna í heild. Niðurstaðan yrði notuð sem viðmið við mat á hvort Þjóðverjar gætu lagt meira af mörkum til að skapa efnahagslegan jöfnuð innan ESB.

Afgangur á vöruskiptareikningi Þjóðverja varð meiri í september en nokkru sinni fyrr, tekjur af útflutningi voru 18,8 milljörðum evra hærri en útgjöld vegna innflutnings. Þegar tölurnar birtust sættu Þjóðverjar gagnrýni frá Bandaríkjastjórn og stjórnendum Alþjóðagjaldeyrissjóðsins. Sagt var að þeir yllu samaðilum að evru-samstarfinu vandræðum.

Barrsoso sagði að Þjóðverjar bæru sérstaka ábyrgð innan evru-svæðisins. Hann sagði rangt að skilgreina vandann á þann hátt að hann fælist í samkeppnishæfni Þjóðverja. „Vandinn er miklu frekar sá að aðrar þjóðir standa þeim enn verulega að baki í samkeppnishæfni,“ sagði hann.

Heimildin til úttektar og rannsókna á þessum þætti í efnahagslífi Þýskalands er reist á ESB-reglum um heimild til að grafast fyrir um ástæður jafnvægisleysis í efnahagsmálum innan sambandsins. Ríkið sem er undir rannsókn á ekki sjálfkarafa á hættu að verða beitt ESB-refsiaðgerðum. Til þeirra kynni hins vegar að verða gripið síðar fari ríkið ekki að fyrirmælum frá Brussel. Refsingin kynni að felast í sekt sem næmi 0,1% af vergri landsframleiðslu ríkisins. Yrðu Þjóðverðar sektaðir á þessum grunni mundi það nema nokkrum milljörðum evra.

Á árinu 2012 rannsakaði framkvæmdastjórn ESB stöðu þessara mála í Belgíu, Bretlandi, Búlgaríu, Danmörku, Finnlandi, Frakklandi, Hollandi, Ítalíu, Möltu, Slóveníu, Spáni og Svíþjóð.