Siena: Björgun elsta banka heims slegið á frest - logandi ágreiningur eigenda og stjórnenda - óvissa um þriðja stærsta banka Ítalíu

Hluthafar í elsta banka heims, ítalska bankanum Banca Monte dei Paschi di Siena, samþykktu laugardaginn 28. desember að fresta endurfjármögnun bankans fram á mitt ár 2014. Stjórnendur bankans vildu að gripið yrði til aðgerða í því skyni að forða bankanum frá þjóðnýtingu strax í janúar 2014.

Antonella Mansi

Monte dei Paschi-sjóðurinn sem á 33,5% í bankanum beitti sér fyrir frestun 3 milljarða evru endurfjármögnunarinnar fram í maí/júní. Með frestuninni vilja stjórnendur sjóðsins fá meira svigrúm til að selja hlutafé hans í bankanum áður en það verður að engu.

Stjórnendur bankans hafa lýst „mikilli óánægju“ með ákvörðun hluthafanna en borgarstjórinn í Siena tekur undir með hluthöfunum og segir: „Við getum ekki látið þriðja stærsta banka þessa lands [Ítalíu] verða útlendingum að bráð.“

Alessandro Profumo

Reuters-fréttastofan segir að stjórnarformaður bankans og bankastjórinn kunni nú að segja af sér þar sem tillaga þeirra hafi ekki náð fram að ganga.

Stjórnendur elsta banka í heimi verða að fá aukið hlutafé til að greiða ítalska ríkinu til baka 4,1 milljarð evra sem það lánaði bankanum fyrr á þessu ári í stað þess að þjóðnýta hann.

Monte dei Paschi-sjóðurinn hefur lykilstöðu innan bankans í krafti hlutafjáreignar sinnar. Sjóðinn skortir hins vegar fjárhagslegt bolmagn til að leggja fram nýtt hlutafé. Sjóðstjórnin vill fá svigrúm til að selja hluta af eign sinni í bankanum til að hún geti borgað skuldir sjóðsins sjálfs.

Antonella Mansi, 39 ára fjársýslukona, tók nýlega við forystu í Monte dei Paschi-sjóðnum. Hún sagði að í kröfunni um lengri tíma til að endurfjármagna bankann fælist ekki vantraust á stjórnendur bankans. Ósk þeirra um endurfjármögnun í janúar mundi hins vegar stórskaða sjóðinn, hann mundi í raun ekki eiga neitt eftir til að greiða 340 milljóna evru skuldir sínar.

„Okkur er skylt að tryggja líf sjóðsins. Þið getið ekki beðið okkur að láta hann falla,“ sagði hún.

Alessandro Profumo, formaður bankastjórnarinnar sem áður var forstjóri UniCredit, sagði að hann og Fabrizio Viola bankastjóri tækju í janúar ákvörðun um hvort þeir segðu af sér. „Ákvarðanir af þessu tagi taka menn eftir kalt mat og á réttum stað,“ sagði Profumo á hluthafafundinum.

Á blaðamannafundi sagði Profumo: „Það sem mér er efst í huga er að ná í 3 milljarða evra af því að við verðum að endurgreiða skattgreiðendum 4 milljarða. Nú ríkir um þetta hættuleg óvissa.“

Viola sagði við blaðamennina að hann mundi gera allt „til að skipið sökkvi ekki“, hann gæti hins vegar ekki axlað ábyrgð vegna mistaka annarra.

Antonella Mansi sagði á hluthafafundinum að það væri erfitt að ímynda sér að þriðji stærsti banki Ítalíu gæti ekki fengið stuðning annarra banka til að auka hlutafé sitt eftir maí 2014.

Bankinn er stærsti atvinnurekandinn í Siena og þar óttast margir að endurfjármögnunin verði til þessa að rjúfa lífæðina milli bankans og borgarinnar. Borgarsjóðurinn er stærsti hluthafinn í Monte dei Paschi-sjóðnum. Bruno Valentini borgarstjóri sagði að með því að fresta endurfjármögnuninni tækist ef til vill að halda útlendingum frá eignarhaldi á bankanum. „Monte dei Paschi snertir ekki aðeins Siena hann er stórt mál allrar þjóðarinnar,“ sagði borgarstjórinn, þriðji stærsti banki Ítalíu mætti ekki verða útlendingum að bráð.