Úkraína: Rússar vara við stjórnleysi vegna þess að átök stigmagnist

Sergei Lavrov, utanríkisráðherra Rússa, sagði þriðjudaginn 21. janúar hættu á að stjórnleysi yrði í Úkraínu ef ekki tækist að hafa hemil á andstæðingum forseta landsins og ríkisstjórn sem börðust við lögreglu á götum Kíev fram undir morgun aðra nóttina í röð. Mótmælendur kasta mólótov-kokkteilum og grjóti að lögreglumönnum sem svara með höggsprengjum, gúmmíkúlum og táragasi.

Lavrov ræddi við fjölmiðlamenn í Moskvu þriðjudaginn 21. janúar og hvatti þar ESB-ríki til að halda sér frá beinum afskiptum af þrástöðunni milli stjórnarandstæðinga og stjórnarsinna í Úkraínu. Utanríkisráðherrann sagði:

„Við teljum æskilegt að sumir starfsbræður okkar í Evrópu láti hjá hlíða að haga sér óhæfilega vegna vandans í Úkraínu, þegar ráðherrar í ríkisstjórnum nokkurra Evrópulanda fara, án þess að hafa fengið nokkurt boð, með hraði til Maidan [Sjálfstæðistorgsins], taka þátt í mótmælum gegn ríkisstjórn lands þrátt fyrir stjórnmálasamband við hana. Það er ekki annað en fyrirlitlegt.“

Þegar Lavrov hélt blaðamannafund sinn höfðu borist fréttir um að lögregla hefði gert áhlaup á mótmælendur til að fjarlægja víggirðingar þeirra. Utanríkisráðherrann lét einnig í ljós ótta um að átökin í Kíev mundu stigmagnast:

„Ég er persónulega þeirrar skoðunar að varnaðarorðin sem forystumenn stjórnarandstöðunnar flytja – einkum Vitali Klitstjkó – sýni að ástandið er að verða stjórnlaust.“

Fréttir herma að Klitsjkó og öðrum forystumönnum stjórnaraandstöðunnar hafi mistekist að hafa hemil á ofbeldisverkum. Klistjkó sakaði ríkisstjórnina um að greiða slagsmálamönnum fyrir að stofna til vandræða í því skyni að setja mótmælendur í slæmt ljós.