Forseti Ítalíu óttast að lýðræðishallinn innan ESB fæli fólk frá sambandinu

Girorgio Napolitano (88 ára), forseti Ítalíu, flutti ræðu á ESB-þinginu í Strassborg þriðjudaginn 4. febrúar og mælti gegn málstað andstæðinga ESB, hann ætti ekki að ráða ferð í baráttunni fyrir ESB-þingkosningarnar í maí. Mikilvægt væri að takast á um raunveruleg viðfangsefni sem snertu hag almennings. ESB-þingmenn Lega Nord-flokksins á Ítalíu gerðu hróp að forsetanum.

Uppnám varð í ESB-þingsalnum þegar þingmenn Lega Nord lyftu spjöldum gegn evrunni.

Þingmenn Lega Nord, Norðurbandalagsins, héldu á spjöldum þar sem stóð: „Basta euro“ – burt með evruna. Einn úr hópnum, Matteo Salvini, hrópaði: „Napolitano kann ekki að skammast sín!“

Ítalski forsetinn sagði að kosningarnar í maí „skiptu sköpum“ fyrir ESB vegna „kreppu í almennum stuðningi“. Hann sakaði þá sem boðuðu upplausn ESB um „ódýran áróður… [og] fáheyrða einföldun“. Forsetinn sagði: „Við verðum að bejast gegn þjóðernislegri eigingirni og íhaldssemi sem einkennist af tímaskekkju.“

Hann gagnrýndi á hinn bóginn stuðningsmenn ESB fyrir „hik, tafir og ósamstöðu“. Forsetinn sagði:

„Kjósendur standa frammi fyrir villandi vali á milli þreyttra málsvara í varnarstöðu í Evrópu sem hefur glímt við meiriháttar vandræði á leið sinni til samruna og hins vegar niðurrifsafla með áróður gegn evrunni og sambandinu.“

Forsetinn sagði að óhjákvæmilegt hefði verið að grípa til opinberra aðhaldsaðgerða á fyrstu stigum fjármálakreppunnar til að koma á stöðugleika en hins vegar mætti ekki standa of lengi á bremsunum vegna hins félagslega kostnaðar sem því fylgdi til dæmis með auknu atvinnuleysi ungs fólks. Þá hefði skortur á lýðræðislegu aðhaldi vegna efnahagsstjórnar innan ESB fælt kjósendur á brott.

„Ég er raunar þeirrar skoðunar að lýðræðishallinn við töku ákvarðana innan ESB hafi skipt miklu máli,“ sagði forseti Ítalíu þegar hann lýsti áhyggjum sínum vegna áhugaleysis almennings á ESB.