Hollendingar mundu hagnast um milljarða evra með úrsögn úr ESB - ný úttektarskýrsla birt - Wilders berst fyrir úrsögn, flokkur hans stærstur

Gert Wilders, formaður Frelsisflokksins í Hollandi, kynnti fimmtudaginn 6. febrúar úttekt sem berska hugveitan Capital Economics vann að frumkvæði flokks um fjárhagslegan hag Hollendinga af ESB-aðild. Þar kemur fram að verg landsframleiðsla á mann (VLF) í Hollandi mun aukast um 10.000 evrur á mann á næstu tveimur áratugum segðu Hollendingar sig úr ESB. VLF í Hollandi er nú 35.000 evrur á mann. Wilders kynnti einnig stefnu sína undir heitinu NExit, það er Holland úr ESB.

„Ég get ekki skýrt fyrir neinum kjósanda í Hollandi að við verðum að hækka skatta og minnka til dæmis heilbrigðisþjónustu við aldraða en senda milljarða evra til Suður-Evrópu eða greiða alls konar gjöld til Brussle,“ sagði Wilders á blaðamannafundi fyrir framan hollenska þinghúsið.

Skoðanakönnun sem birt var í síðustu viku sýnir að næstum jafnmargir hollenskir kjósendur ætla að leggja Frelsisflokki Wilders lið eins og báðum stjórnarflokkunum samanlagt yrði gengið til þingkosninga núna. Þær verða ekki fyrr en 2017 nema þing verði rofið hins vegar verður gengið til kosninga til ESB-þingsins í maí 2014. Wilders vonar að flokkur sinn fái mest fylgi þeim kosningum.

Í úttekt Capital Economics kemur fram að efnahagur Hollendinga mundi batna við að þurfa ekki að leggja fram fé til fjárlaga ESB. Þegar litið er til framlaga miðað við höfðatölu greiða Hollendingar einna mest til ESB.

Þá kemur fram í úttektinni að eftir úrsögn úr ESB geti hollenski seðlabankinn lagað peningastefnuna betur að hagsmunum Hollendinga sjálfra.

Í úttekt Capital Economics segir að svissneski kosturinn (tvíhliða samningar) eða norski kosturinn (EES-aðild) séu færir fyrir Hollendinga.

Wilders sagði að í skýrslunni væri að finna „bestu fréttir sem Hollendingar hafa fengið í mörg ár“.

Í úttektarskýrslunni segir:

„Ákvörðun um að hverfa úr ESB snýst fyrst og síðast um félagsmál, menningarmál og stjórnmál. Hún hlýtur að lúta að fullveldi þjóðar, ríkisborgararétti og frelsi til eigin ákvarðana.

Á hinn bóginn er einnig rík ástæða til að ætla að þjóð, laus undan skrifræðinu í Brussel og frjáls til að taka eigin ákvarðanir í stað þess að verða sett í sama mót og aðrir, njóti þess einnig efnahagslega.“

Jafnvel þótt Hollendingum tækist ekki að ná samningum eins og Svisslendingar eða Norðmenn sem eigi aðild að innri markaði ESB en ekki í ESB yrði „efnahagslega betra fyrir þá að standa utan ESB en vera innan sambandsins,“ segir í skýrslunni.

„Andstætt því sem boðað er með hræðsluáróðrinum mun hagkerfi okkar ekki lamast. Við mundum þvert á móti hagnast um milljarða miðað við stöðuna núna,“ sagði Wilders.

Nýleg könnun á vegum Maurice de Hond sýnir að 55% Hollendinga segjast styðja úrsögn úr ESB sé unnt að sýna fram á að hún bæti efnahag þeirra og fjölgi störfum.