Bandaríkin: Skipan fávíss fjársafnara í sendiherraembætti í Osló vekur hneykslan

Í Bandaríkjunum tíðkast að forsetinn verðlauni þá sem leggja verulega mikið af mörkum til kosningabaráttu hans með því að skipa þá sendiherra. Skiptar skoðanir eru um hve mikið gagn þeir gera í þágu utanríkisstefnu Bandaríkjanna.

Frá því hefur verið sagt hér á Evrópuvaktinni að George Tsunis, fjársafnari fyrir Barack Obama, fékk sendiherraembætti í Noregi að launum. Tsunis þótti standa sig ákaflega illa þegar hann sat fyrir svörum í utanríkismálanefnds öldungadeildar Bandaríkjaþings. Hann vissi ekki hvaða flokkar sitja í norsku ríkisstjórninni og taldi Noreg lýðveldi en ekki konungsríki.

Henry Barkey, fyrrv. starfsmanni í utanríkisþjónustunni, núverandi prófessor í alþjóðasamskiptum við Lehigh-háskóla, blöskraði svo framganga Tsunis að hann skrifaði grein í The Washington Post þar sem hann sagði: „Obama forseti gerir Norðmönnum, sjálfum sér og umfram allt annað bandarísku þjóðinni óleik með því að senda svo vanhæfan mann til að verða fulltrúi sinn í höfuðborg gamals bandamanns í NATO.“ Hann sagði að um væri að ræða „þriggja ára skemmtireisu á kostnað skattgreiðenda til að skoða [norsku] firðina“.

Í The Washington Post mánudaginn 10. febrúar segir að Geroge Tsunis sé ekki einn á báti: nú eru 23 sendiherrar eða tilnefndir sendiherrar skipaðir á pólitískum forsendum vegna þess hve miklu fé þeir söfnuðu. Til að sýna hve marga sendiherra er um að ræða gerði stofnunin Slate and the Center for Public Integrity kort sem hér er birt. Fjársafnarar í þágu Obama síðan 2007 eru 23 (grænir) og hafa þeir safnað 16,1 milljón dollara síðan 2007. Þá eru þarna aðrir sendiherrar sem hafa hlotið pólitíska skipun (rauðir) og þeir sem eru atvinnumenn í utanríkisþjónustunni sjást einnig (bláir).