Skýrsla Hagfræði­stofnunar: Umsóknarríki verða að ganga að öllu regluverki ESB-Engar varanlegar undanþágur

Óvíst að hægt yrði setja hömlur á framsal aflaheimilda til annarra en Íslendinga

Morgunblaðið segir í morgun frá helztu atriðum í skýrslu Hagfræðistofnunar Háskóla Íslands um stöðu viðræðna Íslands við Evrópusambandið og þróun þess, en skýrslan var til umræðu í þingflokkum stjórnarflokkanna í gærkvöldi og verður rædd á ríkisstjórnarfundi fyrir hádegi. Í kjölfar þess verður hún lögð fram á Alþingi.

Helztu atriði skýrslunnar skv. fréttum Morgunblaðsins eru þessi:

Það er meginkrafa Evróðusambandsins að umsóknarríki gangi að öllu regluverki ESB óbreyttu.

„Það á auðvitað alveg sérstaklega við um málaflokka þar sem tekin hefur verið upp sameiginleg stefna og sambandið fer að verulegu leyti eitt með vald eins og í landbúnaðar- og fiskveiðimálum...Frá þessu er í grundvallaratriðum aðeins veittar tímabundnar undanþágur. Þær eru einkum hugsaðar sem aðlögunartími fyrir aðildarríki til að laga sig að breyttum aðstæðum...“,segir í skýrslunni skv. frásögn Morgunblaðsins.

Hingað til hefur ekki verið um varanlegar undanþágur að ræða á sviði sjávarútvegs- og landbúnaðarmála.

Ólíklegt er að hægt sé að sækja um varanlega undanþágu á takmörkunum á fjárfestingum útlendinga í sjávarútvegsfyrirtækjum en hugsanlega mætti fá tímabundnar undanþágur.

Óvíst er að hægt yrði að setja hömlur á framsal aflaheimilda til annarra en Íslendinga og íslenzkra fyrirtækja.

Samningaumboð við lönd utan ESB um veiði úr deili- eða flökkustofnum er í höndum ESB en ekki einstakra ríkja.

„...ljóst að ekki væri hægt að fá undanþágu frá ákvæðinu um að heildarafli í helztu veiðum skuli ákvarðaður formlega á vettvangi Evrópusambandsins, þrátt fyrir að lögsaga Íslands yrði skilgreind sem sérstakt fiskveiðistjórnarsvæði.“

Nánast öruggt að Ísland geti ekki samið sig frá algjöru banni við hvalveiðum.