Breski flugherinn vill drón til eftirlitsstarfa á höfunum við Bretlandseyjar - unnið að þróun með Bandaríkjamönnum

Varnarmálaráðuneyti Bretlands kannar kosti þess að festa kaup á risa-drónum til að halda uppi eftirliti við strendur Bretlands. Fjarstýrðu loftförin kæmu í stað Nimrod-eftirlitsvélanna sem hverfa úr sögunni. Nimrod-þoturnar eru langdrægar og geta tekið þátt í leit og björgun í nágrenni við Ísland.

Drón af Triton-gerð getur farið í allt að 20 km hæð og verið meira en 24 stundir á lofti.

Í The Sunday Telegraph 13. apríl segir að sérþjálfaðir menn á vegum breska varnarmálaráðuneytisins fari til tveggja mánaða æfinga í Bandaríkjunum næsta sumar og muni mennirnir æfa stjórn á Triton-eftirlitsdróni sem hafi sama vænghaf og lítil flugvél og getur flogið í allt að 20 km hæð og verið rúman sólarhring á lofti í einu flugi.

Breska ríkisstjórnin tekur árið 2015 ákvörðun um hvernig fylla beri skarðið eftir Nimrod-þoturnar. Yfirmenn í breska hernum telja óviðunandi að ekki séu gerðar ráðstafanir til mótvægis við ákvörðun ríkisstjórnar Davids Camerons um að leggja Nimrod- eftirlitsþotunum. Brotthvarf vélanna svipti herinn lykilbúnaði til að vernda hafsvæði og skip við Bretlandseyjar. Þá sé óviðunandi eiga allt undir eftirlitsvélum frá Bandaríkjunum, Kanada, Noregi og Frakklandi.

Í The Sunday Telegraph segir að án eftirlitsflugvéla stæðu bresk stjórnvalda ráðþrota til dæmis ef grípa þyrfti til leitar á borð við þá sem staðið hefur vegna hvarfs á flugvélinni MH 370 frá Malasíu. Breski flugherinn mæli með því við ríkisstjórnina að keypt verði drón og auk þess hefðbundnar eftirlitsflugvélar til að fylla í Nimrod-skarðið.

Bandaríski sjóherinn hefur fest kaup á 68 Northrop Grumman MQ-4C Triton drónum og er nýlokið við tilraunaflug þeirra. Í drónunum eru tæki sem gera kleift að fylgjast með því sem gerist hringinn í kringum þau og unnt er að senda þau í 2000 sjómílna leiðangur. Bandaríski flotinn tekur Triton-drónin í notkun eftir þrjú ár.

Bandaríkjamenn hyggjast nota drón við hlið Boeing P-8 Poseidon eftirlitsvélum á hafi úti og Bretar hafa einnig sent menn til þjálfunar í vélum af þessari gerð. Varnarmálaráðherra Breta heimsótti nýlega Jacksonville í Flórída þar sem P-8 vélar hafa bækistöð og segja heimildarmenn að hann hafi kunnað að meta hæfni þeirra.

Frá því undir lok sjöunda áratugarins hafa Nimrod-þotur verði þungamiðjan í eftirlitsflugflota breska flughersins. Ákveðið var að leggja þeim árið 2010.