Heimir Már svarar fyrir Ísland á ESB-blaðamannafundi

Heimir Már Pétursson. fréttamaður á Stöð 2, var á blaðamannafundi í Brussel að loknum fundi leiðtogaráðs ESB 17. júní, þegar aðildarumsókn Íslands var til afgreiðslu. Hann segir svo frá á visir.is 20. júní:

„Meðal þekktra fréttamanna sem fylgdust með fundinum var Adam Bolton pólitískur fréttaskýrandi Sky fréttastofunnar, en hann fylgdist m.a. með leiðtogafundinu Reagans og Gorbatsjofs á íslandi árið 1986. Á bilinu sex hundruð til eitt þúsund frétta- og myndatökumenn voru á fundinum. Enginn íslenskur ráðamaður var þar til svara vegna aðildarumsóknarinnar og kom það í hlut Stefáns Hauks Jóhannessonar formanns samninganefndar Íslands og sendiherra að svara fyrir Íslands hönd. Það dugði þó ekki öllum fréttamönnum og lenti undirritaður í nokkrum viðtölum til að skýra út stöðu mála á Íslandi.“

Í pottinum hafa menn lengi furðað sig á hvaða aðferðafræði sé beitt af hálfu ráðherranna, sem bera höfuðábyrgð á umsókn Íslands, þeirra Jóhönnu Sigurðardóttur og Össurar Skarphéðinssonar. Þau læðupokast í útlöndum og nota aldrei nein tækifæri, sem gefast til að halda málstað lands og þjóðar fram eða svara spurningum fréttamanna.

Fjarvera þeirra frá blaðamannafundinum í Brussel sé almennt túlkuð þannig af þeim, sem hann sátu, að varla geri hugur fylgt máli hjá ríkisstjórn Íslands, þegar jafnilla sé staðið að því að kynna málstað þjóðarinnar. Sendiherra komi aldrei í stað ráðherra á fundi sem þessum.