Er ráðandi stjórnmálastétt á Íslandi ráðþrota?

Er stjórnmálastéttin á Íslandi ráðþrota? Nú er liðið á annan sólarhring frá hinum miklu og sögulegu mótmælum á Austurvelli og enn bryddar ekki á hugmyndum frá stjórnmálastéttinni um raunsæ viðbrögð við þeim augljósu kröfum, sem þar komu fram.

Sjálfstæðismenn hafa að vísu hvatt til lengingar lána og lækkunar höfuðstóls og Framsóknarmenn hafa vísað til upphaflegra hugmynda sinna um flatan niðurskurð en ráðandi ríkisstjórn virðist ekkert hafa fram að færa ef marka má frásögn fulltrúa stjórnarandstöðunnar af fundi þeirra með forsætisráðherra og fjármálaráðherra í gær.

Steingrímur J. Sigfússon hefur sagt að þær hugmyndir, sem frá upphafi hafa verið reifaðar um að færa verðtryggingu lána til upphafs ársins 2008, sem svo hafa komið fram í ýmsum myndum síðan séu of dýrar fyrir ríkissjóð.

Að sjálfsögðu verður að ræða það, hvort Steingrímur J. hafi rétt fyrir sér. En þá verður hann að leggja grundvöll að slíkum umræðum með öðru en staðhæfingum einum. Hann verður að leggja fram upplýsingar og rök.

Og jafnframt verður hann að útskýra á hvern hátt sú lausn verður dýrari fyrir íslenzkt samfélag en afleiðingar þess að mæta á engan hátt þeirri reiði og vonleysi og fyrirlitningu á stjórnvöldum, sem birtust á Austurvelli sl. mánudagskvöld.