Nú reynir á þingmenn Vinstri grænna

Þessa dagana beinist athygli manna að því hver afstaða einstakra þingmanna VG verður til fjárlagafrumvarpsins. Það er í sjálfu sér áhugavert en prófsteinninn á þingmenn Vinstri grænna verður sá, hvort þeir muni allir sem einn styðja þann nýja Icesavesamning, sem formaður þeirra hefur gert. Í honum felast a.m.k. 47 milljarða útgjöld fyrir þjóðina og hugsanlega miklu meira. Þeir eru hins vegar að berjast sín í milli um nokkur hundruð milljónir til eða frá.

Greiði allir þingmenn VG atkvæði með hinum nýju Icesave-samningum er ljóst, að þeir hafa gefizt upp fyrir kúgunum og hótunum hinna gömlu nýlenduvelda í Evrópu.

Þeir hafa gefizt upp fyrir neðanjarðarhernaði ráðandi afla í ESB sem á yfirborðinu segja, að Icesave skipti engu máli í samskiptum Íslands og ESB en undir yfirborðinu vinna þessi öfl að því að kúga okkur til undirskriftar. Og það gera þau á sama tíma og umræður innan ESB snúast um það að ríki eigi ekki að ábyrgjast skuldbindingar einkabanka!

Þeir hafa þá líka gefizt upp fyrir AGS sem í orði hefur þvegið hendur sínar af Icesave-málinu en hefur unnið leynt og ljóst á borði að því að fá okkur til að borga skuldir, sem við eigum ekki að borga.

Þetta er hinn raunverulegi prófsteinn á það hvort þingmenn VG meina eitthvað með því sem þeir segja.

Það eru meiri líkur en minni að þeir falli á prófinu.