Andófsmennirnir í VG geta sett ríkis­stjórninni skilyrði

Ónafngreindir þingmenn Samfylkingarinnar veifuðu þeirri hótun framan í Vinstri græna í fréttum RÚV í gærkvöldi, að þeir gætu vel hugsað sér að mynda nýja ríkisstjórn með Framsóknarflokki eða Sjálfstæðisflokki eða jafnvel að taka Framsóknarflokkinn inn í núverandi ríkisstjórn eins og áður hefur verið fjallað um á þessum vettvangi.

Nú er auðvitað ljóst, að Samfylking getur ekki myndað ríkisstjórn með Framsóknarflokknum einum. Til þess hafa þessir tveir flokkar ekki nægilega marga þingmenn. Hins vegar mundu Sjálfstæðisflokkur og Samfylking auðvitað hafa meirihluta á þingi en væri Samfylking reiðubúinn til að kaupa slíkt samstarf því verði að draga aðildarumsókn að Evrópusambandinu til baka?

Í ljósi samþykkta síðasta landsfundar Sjálfstæðisflokks er auðvitað ljóst að sá flokkur mundi ekki ganga til samstarfs við Samfylkingu í ríkisstjórn án þess. Og líkurnar á því, að Samfylking mundi ganga að slíku skilyrði eru nánast engar.

Eru líkur á því, að meirihluti þingflokks Vinstri grænna reki þremenningana – eða sexmenningana- úr þingflokknum? Þær eru nánast engar eins og m.a. má sjá á yfirlýsingu Ögmundar Jónassonar í Morgunblaðinu í dag.

Og jafnvel þótt Steingrími J. Sigfússyni dytti slíkt í hug vegna þess, að fyrstu viðbrögð hans eru jafnan að ryðjast yfir fólk í stað þess að tala við það, mundi hann fljótt ná áttum. Líkurnar á því, að sá flokkur, sem þá yrði til næði til meirihluta núverandi kjósenda VG eru yfirgnæfandi.

Hvað þýðir þetta?

Þetta þýðir, að andófsmennirnir í þinflokki Vinstri grænna hafa náð svo sterkri pólitískri stöðu, að þeir geta nánast sett ríkisstjórninni skilyrði.

Það verður fróðlegt að sjá, hvort þeir fylgja þeirri sterku stöðu eftir í verki.