Hver segir að Bretar og Hollendingar fari fyrir dómstóla?

mbl.is

Sumir lögfræðingar halda því fram í blöðunum í dag, að þjóðaratkvæðagreiðslan um Icesave III snúizt um það hvort sá samningur verði staðfestur eða deilan fari fyrir dómstóla. Hvaðan kemur þeim sá vísdómur? Hver getur fullyrt að Bretar og Hoillendingar fari með málið fyrir dómstóla? Varla fara Íslendingar með málið þá leið verði samningurinn felldur í þjóðaratkvæðagreiðslu!

Það má vel vera að frá sjónarhóli þeirra, sem horfa á málið frá lögfræðilegu sjónarmiði eingöngu sé líklegast að deilumál fari fyrir dómstóla, sem ekki hefur tekizt að leysa með samningum.

En í deilum þjóða á milli á alþjóða vettvangi koma fleiri sjónarmið til sögunnar, eins og m.a. má sjá í gögnum, sem birt hafa verið á vef Donalds Rumsfelds, fyrrum varnarmálaráðherra Bandaríkjanna, sem var sendiherra Bandaríkjanna hjá Atlantshafsbandalaginu á tímum seinni þorskastríðanna.

Hvers vegna lögðu Bandaríkjamenn að Bretum að gefast upp fyrir Íslendingum í þorskastríðunum? Vegna þess að Bandaríkjamenn mátu það svo, að MEIRI HAGSMUNIR væru í húfi en fiskveiðar Breta á Íslandsmiðum.

Felli þjóðin Icesave III í þjóðaratkvæði og Bretar og Hollendingar íhugi að fara dómstólaleiðina vaknar sú spurning ekki bara hjá þeim heldur í öllu hinu alþjóðlega fjármálakerfi, hvaða afleiðingar það mundi hafa ef Bretar og Hollendingar töpuðu málinu fyrir dómstól. Og þá er auðvelt að sjá símalínur loga landa á milli til þess að koma í veg fyrir að slík áhætta verði tekin. Í bókhaldi Breta og Hollendinga snúist Icesave um svo litlar upphæðir að ekki sé hægt að taka áhættuna af því að sú litla þúfa velti þyngra hlassi.

Hin endanlega ákvörðun Breta og Hollendinga verður ekki tekin út frá lögfræðilegum sjónarmiðum. Hún mun byggjast á stórpólitískum og miklum fjárhagslegum hagsmunum hins alþjóðlega fjármálakerfis.

Þess vegna ættu lögfræðingarnir, sem nú segja þjóðinni að atkvæðagreiðsla hennar snúist annað hvort um að segja já við samningunum sem fyrir liggja eða að málið fari fyrir dómstóla að hafa fyrirvara á yfirlýsingum sínum.

Þeir horfi á málið út frá lögfræðilega sjónarhorni eingöngu. Þeir verði að viðurkenna að stjórnvöld í Bretlandi og Hollandi muni horfa til fleiri átta.